Troilus and Criseyde – Book 3

By Geoffrey Chaucer

Tr 3 1 O blisful light of which the bemes clere
Tr 3 2 Adorneth al the thridde heven faire!
Tr 3 3 O sonnes lief, O Joves doughter deere,
Tr 3 4 Plesance of love, O goodly debonaire,
Tr 3 5 In gentil hertes ay redy to repaire!
Tr 3 6 O veray cause of heele and of gladnesse,
Tr 3 7 Iheryed be thy myght and thi goodnesse!
Tr 3 8 In hevene and helle, in erthe and salte see
Tr 3 9 Is felt thi myght, if that I wel descerne,
Tr 3 10 As man, brid, best, fissh, herbe, and grene tree
Tr 3 11 Thee fele in tymes with vapour eterne.
Tr 3 12 God loveth, and to love wol nought werne,
Tr 3 13 And in this world no lyves creature
Tr 3 14 Withouten love is worth, or may endure.
Tr 3 15 Ye Joves first to thilke effectes glade,
Tr 3 16 Thorugh which that thynges lyven alle and be,
Tr 3 17 Comeveden, and amorous him made
Tr 3 18 On mortal thyng, and as yow list, ay ye
Tr 3 19 Yeve hym in love ese or adversitee,
Tr 3 20 And in a thousand formes down hym sente
Tr 3 21 For love in erthe, and whom yow liste he hente.
Tr 3 22 Ye fierse Mars apaisen of his ire,
Tr 3 23 And as yow list, ye maken hertes digne;
Tr 3 24 Algates hem that ye wol sette a-fyre,
Tr 3 25 They dreden shame, and vices they resygne;
Tr 3 26 Ye do hem corteys be, fresshe and benigne;
Tr 3 27 And heighe or lowe, after a wight entendeth,
Tr 3 28 The joies that he hath, youre myght it sendeth.
Tr 3 29 Ye holden regne and hous in unitee;
Tr 3 30 Ye sothfast cause of frendship ben also;
Tr 3 31 Ye knowe al thilke covered qualitee
Tr 3 32 Of thynges, which that folk on wondren so,
Tr 3 33 Whan they kan nought construe how it may jo
Tr 3 34 She loveth hym, or whi he loveth here,
Tr 3 35 As whi this fissh, and naught that, comth to were.
Tr 3 36 Ye folk a lawe han set in universe,
Tr 3 37 And this knowe I by hem that lovers be,
Tr 3 38 That whoso stryveth with yow hath the werse.
Tr 3 39 Now, lady bryght, for thi benignite,
Tr 3 40 At reverence of hem that serven the,
Tr 3 41 Whos clerc I am, so techeth me devyse
Tr 3 42 Som joye of that is felt in thi servyse.
Tr 3 43 Ye in my naked herte sentement
Tr 3 44 Inhielde, and do me shewe of thy swetnesse.
Tr 3 45 Caliope, thi vois be now present,
Tr 3 46 For now is nede: sestow nought my destresse,
Tr 3 47 How I mot telle anonright the gladnesse
Tr 3 48 Of Troilus, to Venus heryinge?
Tr 3 49 To which gladnesse, who nede hath, God hym brynge!
Tr 3 50 Lay al this mene while Troilus,
Tr 3 51 Recordyng his lesson in this manere:
Tr 3 52 “Mafay,” thoughte he, “thus wol I sey, and thus;
Tr 3 53 Thus wol I pleyne unto my lady dere;
Tr 3 54 That word is good, and this shal be my cheere;
Tr 3 55 This nyl I nought foryeten in no wise.”
Tr 3 56 God leve hym werken as he kan devyse!
Tr 3 57 And, Lord, so that his herte gan to quappe,
Tr 3 58 Heryng hire come, and shorte for to sike!
Tr 3 59 And Pandarus, that ledde hire by the lappe,
Tr 3 60 Com ner, and gan in at the curtyn pike,
Tr 3 61 And seyde, “God do boot on alle syke!
Tr 3 62 Se who is here yow comen to visite:
Tr 3 63 Lo, here is she that is youre deth to wite.”
Tr 3 64 Therwith it semed as he wepte almost.
Tr 3 65 “Ha, a,” quod Troilus so reufully,
Tr 3 66 “Wher me be wo, O myghty God, thow woost!
Tr 3 67 Who is al ther? I se nought trewely.”
Tr 3 68 “Sire,” quod Criseyde, “it is Pandare and I.”
Tr 3 69 “Ye, swete herte? Allas, I may nought rise,
Tr 3 70 To knele and do yow honour in som wyse.”
Tr 3 71 And dressed hym upward, and she right tho
Tr 3 72 Gan bothe hire hondes softe upon hym leye.
Tr 3 73 “O, for the love of God, do ye nought so
Tr 3 74 To me,” quod she, “I! What is this to seye?
Tr 3 75 Sire, comen am I to yow for causes tweye:
Tr 3 76 First, yow to thonke, and of youre lordshipe eke
Tr 3 77 Continuance I wolde yow biseke.”
Tr 3 78 This Troilus, that herde his lady preye
Tr 3 79 Of lordshipe hym, wax neither quyk ne ded,
Tr 3 80 Ne myghte o word for shame to it seye,
Tr 3 81 Although men sholde smyten of his hed.
Tr 3 82 But Lord, so he wex sodeynliche red,
Tr 3 83 And sire, his lessoun, that he wende konne
Tr 3 84 To preyen hire, is thorugh his wit ironne.
Tr 3 85 Criseyde al this aspied wel ynough,
Tr 3 86 For she was wis, and loved hym nevere the lasse,
Tr 3 87 Al nere he malapert, or made it tough,
Tr 3 88 Or was to bold, to synge a fool a masse.
Tr 3 89 But whan his shame gan somwhat to passe,
Tr 3 90 His resons, as I may my rymes holde,
Tr 3 91 I yow wol telle, as techen bokes olde.
Tr 3 92 In chaunged vois, right for his verray drede,
Tr 3 93 Which vois ek quook, and therto his manere
Tr 3 94 Goodly abaist, and now his hewes rede,
Tr 3 95 Now pale, unto Criseyde, his lady dere,
Tr 3 96 With look down cast and humble iyolden chere,
Tr 3 97 Lo, the alderfirste word that hym asterte
Tr 3 98 Was, twyes, “Mercy, mercy, swete herte!”
Tr 3 99 And stynte a while, and whan he myghte out brynge,
Tr 3 100 The nexte word was, “God woot, for I have,
Tr 3 101 As ferforthly as I have had konnynge,
Tr 3 102 Ben youres al, God so my soule save,
Tr 3 103 And shal til that I, woful wight, be grave!
Tr 3 104 And though I dar, ne kan, unto yow pleyne,
Tr 3 105 Iwis, I suffre nought the lasse peyne.
Tr 3 106 “Thus muche as now, O wommanliche wif,
Tr 3 107 I may out brynge, and if this yow displese,
Tr 3 108 That shal I wreke upon myn owen lif
Tr 3 109 Right soone, I trowe, and do youre herte an ese,
Tr 3 110 If with my deth youre wreththe may apese.
Tr 3 111 But syn that ye han herd me somwhat seye,
Tr 3 112 Now recche I nevere how soone that I deye.”
Tr 3 113 Therwith his manly sorwe to biholde
Tr 3 114 It myghte han mad an herte of stoon to rewe;
Tr 3 115 And Pandare wep as he to water wolde,
Tr 3 116 And poked evere his nece new and newe,
Tr 3 117 And seyde, “Wo bygon ben hertes trewe!
Tr 3 118 For love of God, make of this thing an ende,
Tr 3 119 Or sle us both at ones er ye wende.”
Tr 3 120 “I, what?” quod she, “by God and by my trouthe,
Tr 3 121 I not nat what ye wilne that I seye.”
Tr 3 122 “I, what?” quod he, “That ye han on hym routhe,
Tr 3 123 For Goddes love, and doth hym nought to deye!”
Tr 3 124 “Now than thus,” quod she, “I wolde hym preye
Tr 3 125 To telle me the fyn of his entente.
Tr 3 126 Yet wist I nevere wel what that he mente.”
Tr 3 127 “What that I mene, O swete herte deere?”
Tr 3 128 Quod Troilus, “O goodly, fresshe free,
Tr 3 129 That with the stremes of youre eyen cleere
Tr 3 130 Ye wolde somtyme frendly on me see,
Tr 3 131 And thanne agreen that I may ben he,
Tr 3 132 Withouten braunche of vice on any wise,
Tr 3 133 In trouthe alwey to don yow my servise,
Tr 3 134 “As to my lady right and chief resort,
Tr 3 135 With al my wit and al my diligence;
Tr 3 136 And I to han, right as yow list, comfort,
Tr 3 137 Under yowre yerde, egal to myn offence,
Tr 3 138 As deth, if that I breke youre defence;
Tr 3 139 And that ye deigne me so muchel honoure
Tr 3 140 Me to comanden aught in any houre;
Tr 3 141 “And I to ben youre — verray, humble, trewe,
Tr 3 142 Secret, and in my paynes pacient,
Tr 3 143 And evere mo desiren fresshly newe
Tr 3 144 To serve, and ben ylike diligent,
Tr 3 145 And with good herte al holly youre talent
Tr 3 146 Receyven wel, how sore that me smerte;
Tr 3 147 Lo, this mene I, myn owen swete herte.”
Tr 3 148 Quod Pandarus, “Lo, here an hard requeste,
Tr 3 149 And resonable, a lady for to werne!
Tr 3 150 Now, nece myn, by natal Joves feste,
Tr 3 151 Were I a god, ye sholden sterve as yerne,
Tr 3 152 That heren wel this man wol nothing yerne
Tr 3 153 But youre honour, and sen hym almost sterve,
Tr 3 154 And ben so loth to suffren hym yow serve.”
Tr 3 155 With that she gan hire eyen on hym caste
Tr 3 156 Ful esily and ful debonairly,
Tr 3 157 Avysyng hire, and hied nought to faste
Tr 3 158 With nevere a word, but seyde hym softely,
Tr 3 159 “Myn honour sauf, I wol wel trewely,
Tr 3 160 And in swich forme as he gan now devyse,
Tr 3 161 Receyven hym fully to my servyse,
Tr 3 162 “Bysechyng hym, for Goddes love, that he
Tr 3 163 Wolde, in honour of trouthe and gentilesse,
Tr 3 164 As I wel mene, ek menen wel to me,
Tr 3 165 And myn honour with wit and bisynesse
Tr 3 166 Ay kepe; and if I may don hym gladnesse,
Tr 3 167 From hennesforth, iwys, I nyl nought feyne.
Tr 3 168 Now beth al hool; no lenger ye ne pleyne.
Tr 3 169 “But natheles, this warne I yow,” quod she,
Tr 3 170 “A kynges sone although ye be, ywys,
Tr 3 171 Ye shal namore han sovereignete
Tr 3 172 Of me in love, than right in that cas is.
Tr 3 173 N’ y nyl forbere, if that ye don amys,
Tr 3 174 To wratthe yow; and whil that ye me serve,
Tr 3 175 Chericen yow right after ye disserve.
Tr 3 176 “And shortly, deere herte and al my knyght,
Tr 3 177 Beth glad, and draweth yow to lustinesse,
Tr 3 178 And I shal trewely, with al my myght,
Tr 3 179 Youre bittre tornen al into swetenesse.
Tr 3 180 If I be she that may yow do gladnesse,
Tr 3 181 For every wo ye shal recovere a blisse” —
Tr 3 182 And hym in armes took, and gan hym kisse.
Tr 3 183 Fil Pandarus on knees, and up his eyen
Tr 3 184 To heven threw, and held his hondes highe:
Tr 3 185 “Immortal god,” quod he, “that mayst nought deyen,
Tr 3 186 Cupide I mene, of this mayst glorifie;
Tr 3 187 And Venus, thow mayst maken melodie!
Tr 3 188 Withouten hond, me semeth that in the towne,
Tr 3 189 For this merveille ich here ech belle sowne.
Tr 3 190 “But ho! namore as now of this matere;
Tr 3 191 For-whi this folk wol comen up anon,
Tr 3 192 That han the lettre red; lo, I hem here.
Tr 3 193 But I conjure the, Criseyde, anon,
Tr 3 194 And to, thow Troilus, whan thow mayst goon,
Tr 3 195 That at myn hous ye ben at my warnynge,
Tr 3 196 For I ful well shal shape youre comynge;
Tr 3 197 “And eseth there youre hertes right ynough;
Tr 3 198 And lat se which of yow shal bere the belle
Tr 3 199 To speke of love aright!” — therwith he lough —
Tr 3 200 “For ther have ye a leiser for to telle.”
Tr 3 201 Quod Troilus, “How longe shal I dwelle,
Tr 3 202 Er this be don?” Quod he, “Whan thow mayst ryse,
Tr 3 203 This thyng shal be right as I yow devyse.”
Tr 3 204 With that Eleyne and also Deiphebus
Tr 3 205 Tho comen upward, right at the steires ende;
Tr 3 206 And Lord, so thanne gan gronen Troilus,
Tr 3 207 His brother and his suster for to blende.
Tr 3 208 Quod Pandarus, “It tyme is that we wende.
Tr 3 209 Tak, nece myn, youre leve at alle thre,
Tr 3 210 And lat hem speke, and cometh forth with me.”
Tr 3 211 She took hire leve at hem ful thriftily,
Tr 3 212 As she wel koude, and they hire reverence
Tr 3 213 Unto the fulle diden, hardyly,
Tr 3 214 And wonder wel speken, in hire absence,
Tr 3 215 Of hire in preysing of hire excellence —
Tr 3 216 Hire governaunce, hire wit, and hire manere
Tr 3 217 Comendeden, it joie was to here.
Tr 3 218 Now lat hire wende unto hire owen place,
Tr 3 219 And torne we to Troilus ayein,
Tr 3 220 That gan ful lightly of the lettre pace
Tr 3 221 That Deiphebus hadde in the gardyn seyn;
Tr 3 222 And of Eleyne and hym he wolde feyn
Tr 3 223 Delivered ben, and seyde that hym leste
Tr 3 224 To slepe, and after tales have reste.
Tr 3 225 Eleyne hym kiste, and took hire leve blyve,
Tr 3 226 Deiphebus ek, and hom wente every wight;
Tr 3 227 And Pandarus, as faste as he may dryve,
Tr 3 228 To Troilus tho com, as lyne right,
Tr 3 229 And on a paillet al that glade nyght
Tr 3 230 By Troilus he lay, with mery chere,
Tr 3 231 To tale; and wel was hem they were yfeere.
Tr 3 232 Whan every wight was voided but they two,
Tr 3 233 And alle the dores weren faste yshette,
Tr 3 234 To telle in short, withouten wordes mo,
Tr 3 235 This Pandarus, withouten any lette,
Tr 3 236 Up roos, and on his beddes syde hym sette,
Tr 3 237 And gan to speken in a sobre wyse
Tr 3 238 To Troilus, as I shal yow devyse:
Tr 3 239 “Myn alderlevest lord, and brother deere,
Tr 3 240 God woot, and thow, that it sat me so soore,
Tr 3 241 Whan I the saugh so langwisshyng to-yere
Tr 3 242 For love, of which thi wo wax alwey moore,
Tr 3 243 That I, with al my myght and al my loore,
Tr 3 244 Have evere sithen don my bisynesse
Tr 3 245 To brynge the to joye out of distresse,
Tr 3 246 “And have it brought to swich plit as thow woost,
Tr 3 247 So that thorugh me thow stondest now in weye
Tr 3 248 To faren wel; I sey it for no bost,
Tr 3 249 And wostow whi? For shame it is to seye:
Tr 3 250 For the have I bigonne a gamen pleye
Tr 3 251 Which that I nevere do shal eft for other,
Tr 3 252 Although he were a thousand fold my brother.
Tr 3 253 “That is to seye, for the am I bicomen,
Tr 3 254 Bitwixen game and ernest, swich a meene
Tr 3 255 As maken wommen unto men to comen;
Tr 3 256 Al sey I nought, thow wost wel what I meene.
Tr 3 257 For the have I my nece, of vices cleene,
Tr 3 258 So fully maad thi gentilesse triste,
Tr 3 259 That al shal ben right as thiselven liste.
Tr 3 260 “But God, that al woot, take I to witnesse,
Tr 3 261 That nevere I this for coveitise wroughte,
Tr 3 262 But oonly for t’ abregge that distresse
Tr 3 263 For which wel neigh thow deidest, as me thoughte.
Tr 3 264 But, goode brother, do now as the oughte,
Tr 3 265 For Goddes love, and kep hire out of blame,
Tr 3 266 Syn thow art wys, and save alwey hire name.
Tr 3 267 “For wel thow woost, the name as yet of here
Tr 3 268 Among the peeple, as who seyth, halwed is.
Tr 3 269 For that man is unbore, I dar wel swere,
Tr 3 270 That evere wiste that she dide amys.
Tr 3 271 But wo is me, that I, that cause al this,
Tr 3 272 May thynken that she is my nece deere,
Tr 3 273 And I hire em, and traitour ek yfeere!
Tr 3 274 “And were it wist that I, thorugh myn engyn,
Tr 3 275 Hadde in my nece yput this fantasie,
Tr 3 276 To doon thi lust and holly to ben thyn,
Tr 3 277 Whi, al the world upon it wolde crie,
Tr 3 278 And seyn that I the werste trecherie
Tr 3 279 Dide in this cas, that evere was bigonne,
Tr 3 280 And she forlost, and thow right nought ywonne.
Tr 3 281 “Wherfore, er I wol ferther gon a pas,
Tr 3 282 The preie ich eft, althogh thow shuldest deye,
Tr 3 283 That privete go with us in this cas;
Tr 3 284 That is to seyn, that thow us nevere wreye;
Tr 3 285 And be nought wroth, though I the ofte preye
Tr 3 286 To holden secree swich an heigh matere,
Tr 3 287 For skilfull is, thow woost wel, my praiere.
Tr 3 288 “And thynk what wo ther hath bitid er this,
Tr 3 289 For makyng of avantes, as men rede;
Tr 3 290 And what meschaunce in this world yet ther is,
Tr 3 291 Fro day to day, right for that wikked dede;
Tr 3 292 For which thise wise clerkes that ben dede
Tr 3 293 Han evere yet proverbed to us yonge,
Tr 3 294 That ‘firste vertu is to kepe tonge.’
Tr 3 295 “And nere it that I wilne as now t’ abregge
Tr 3 296 Diffusioun of speche, I koude almoost
Tr 3 297 A thousand olde stories the allegge
Tr 3 298 Of wommen lost through fals and foles bost.
Tr 3 299 Proverbes kanst thiself ynowe and woost
Tr 3 300 Ayeins that vice, for to ben a labbe,
Tr 3 301 Al seyde men soth as often as thei gabbe.
Tr 3 302 “O tonge, allas, so often here-byforn
Tr 3 303 Hath mad ful many a lady bright of hewe
Tr 3 304 Seyd ‘Weilaway, the day that I was born!’
Tr 3 305 And many a maydes sorwe for to newe;
Tr 3 306 And for the more part, al is untrewe
Tr 3 307 That men of yelpe, and it were brought to preve.
Tr 3 308 Of kynde non avauntour is to leve.
Tr 3 309 “Avauntour and a lyere, al is on;
Tr 3 310 As thus: I pose, a womman grante me
Tr 3 311 Hire love, and seith that other wol she non,
Tr 3 312 And I am sworn to holden it secree,
Tr 3 313 And after I go telle it two or thre —
Tr 3 314 Iwis, I am avauntour at the leeste,
Tr 3 315 And lyere, for I breke my biheste.
Tr 3 316 “Now loke thanne, if they be nought to blame,
Tr 3 317 Swich manere folk — what shal I clepe hem, what? —
Tr 3 318 That hem avaunte of wommen, and by name,
Tr 3 319 That nevere yet bihyghte hem this ne that,
Tr 3 320 Ne knewe hem more than myn olde hat!
Tr 3 321 No wonder is, so God me sende hele,
Tr 3 322 Though wommen dreden with us men to dele.
Tr 3 323 “I sey nought this for no mistrust of yow,
Tr 3 324 Ne for no wis-man, but for foles nyce,
Tr 3 325 And for the harm that in the werld is now,
Tr 3 326 As wel for folie ofte as for malice;
Tr 3 327 For wel woot I, in wise folk that vice
Tr 3 328 No womman drat, if she be wel avised;
Tr 3 329 For wyse ben by foles harm chastised.
Tr 3 330 “But now to purpos; leve brother deere,
Tr 3 331 Have al this thyng that I have seyd in mynde,
Tr 3 332 And kep the clos, and be now of good cheere,
Tr 3 333 For at thi day thow shalt me trewe fynde.
Tr 3 334 I shal thi proces set in swych a kynde,
Tr 3 335 And God toforn, that it shal the suffise,
Tr 3 336 For it shal be right as thow wolt devyse.
Tr 3 337 “For wel I woot, thow menest wel, parde;
Tr 3 338 Therfore I dar this fully undertake.
Tr 3 339 Thow woost ek what thi lady graunted the,
Tr 3 340 And day is set the chartres up to make.
Tr 3 341 Have now good nyght, I may no lenger wake;
Tr 3 342 And bid for me, syn thow art now in blysse,
Tr 3 343 That God me sende deth or soone lisse.”
Tr 3 344 Who myghte tellen half the joie or feste
Tr 3 345 Which that the soule of Troilus tho felte,
Tr 3 346 Heryng th’ effect of Pandarus byheste?
Tr 3 347 His olde wo, that made his herte swelte,
Tr 3 348 Gan tho for joie wasten and tomelte,
Tr 3 349 And al the richesse of his sikes sore
Tr 3 350 At ones fledde; he felte of hem namore.
Tr 3 351 But right so as thise holtes and thise hayis,
Tr 3 352 That han in wynter dede ben and dreye,
Tr 3 353 Revesten hem in grene whan that May is,
Tr 3 354 Whan every lusty liketh best to pleye;
Tr 3 355 Right in that selve wise, soth to seye,
Tr 3 356 Wax sodeynliche his herte ful of joie,
Tr 3 357 That gladder was ther nevere man in Troie.
Tr 3 358 And gan his look on Pandarus up caste
Tr 3 359 Ful sobrely, and frendly for to se,
Tr 3 360 And seyde, “Frend, in Aperil the laste —
Tr 3 361 As wel thow woost, if it remembre the —
Tr 3 362 How neigh the deth for wo thow fownde me,
Tr 3 363 And how thow dedest al thi bisynesse
Tr 3 364 To knowe of me the cause of my destresse.
Tr 3 365 “Thow woost how longe ich it forbar to seye
Tr 3 366 To the, that art the man that I best triste;
Tr 3 367 And peril non was it to the bywreye,
Tr 3 368 That wist I wel; but telle me, if the liste,
Tr 3 369 Sith I so loth was that thiself it wiste,
Tr 3 370 How dorst I mo tellen of this matere,
Tr 3 371 That quake now, and no wight may us here?
Tr 3 372 “But natheles, by that God I the swere,
Tr 3 373 That, as hym list, may al this world governe —
Tr 3 374 And, if I lye, Achilles with his spere
Tr 3 375 Myn herte cleve, al were my lif eterne,
Tr 3 376 As I am mortal, if I late or yerne
Tr 3 377 Wolde it bewreye, or dorst, or sholde konne,
Tr 3 378 For al the good that God made under sonne —
Tr 3 379 “That rather deye I wolde, and determyne,
Tr 3 380 As thynketh me, now stokked in prisoun,
Tr 3 381 In wrecchidnesse, in filthe, and in vermyne,
Tr 3 382 Caytif to cruel kyng Agamenoun;
Tr 3 383 And this in all the temples of this town
Tr 3 384 Upon the goddes alle, I wol the swere
Tr 3 385 To-morwe day, if that it liketh here.
Tr 3 386 “And that thow hast so muche ido for me
Tr 3 387 That I ne may it nevere more disserve,
Tr 3 388 This know I wel, al myghte I now for the
Tr 3 389 A thousand tymes on a morwe sterve.
Tr 3 390 I kan namore, but that I wol the serve
Tr 3 391 Right as thi sclave, whider so thow wende,
Tr 3 392 For evere more, unto my lyves ende.
Tr 3 393 “But here, with al myn herte, I the biseche
Tr 3 394 That nevere in me thow deme swich folie
Tr 3 395 As I shal seyn: me thoughte by thi speche
Tr 3 396 That this which thow me dost for compaignie,
Tr 3 397 I sholde wene it were a bauderye.
Tr 3 398 I am nought wood, al if I lewed be!
Tr 3 399 It is nought so, that woot I wel, parde!
Tr 3 400 “But he that gooth for gold or for ricchesse
Tr 3 401 On swich message, calle hym what the list;
Tr 3 402 And this that thow doost, calle it gentilesse,
Tr 3 403 Compassioun, and felawship, and trist.
Tr 3 404 Departe it so, for wyde-wher is wist
Tr 3 405 How that ther is diversite requered
Tr 3 406 Bytwixen thynges like, as I have lered.
Tr 3 407 “And that thow knowe I thynke nought ne wene
Tr 3 408 That this servise a shame be or jape,
Tr 3 409 I have my faire suster Polixene,
Tr 3 410 Cassandre, Eleyne, or any of the frape —
Tr 3 411 Be she nevere so fair or wel yshape,
Tr 3 412 Tel me which thow wilt of everychone,
Tr 3 413 To han for thyn, and lat me thanne allone.
Tr 3 414 “But, sith thow hast don me this servyse
Tr 3 415 My lif to save and for non hope of mede,
Tr 3 416 So for the love of God, this grete emprise
Tr 3 417 Perfourme it out, for now is moste nede;
Tr 3 418 For heigh and lough, withowten any drede,
Tr 3 419 I wol alwey thyn hestes alle kepe.
Tr 3 420 Have now good nyght, and lat us bothe slepe.”
Tr 3 421 Thus held hym ech of other wel apayed,
Tr 3 422 That al the world ne myghte it bet amende;
Tr 3 423 And on the morwe, whan they were arayed,
Tr 3 424 Ech to his owen nedes gan entende.
Tr 3 425 But Troilus, though as the fir he brende
Tr 3 426 For sharp desir of hope and of plesaunce,
Tr 3 427 He nought forgat his goode governaunce,
Tr 3 428 But in hymself with manhod gan restreyne
Tr 3 429 Ech racle dede and ech unbridled cheere,
Tr 3 430 That alle tho that lyven, soth to seyne,
Tr 3 431 Ne sholde han wist, by word or by manere,
Tr 3 432 What that he mente, as touchyng this matere.
Tr 3 433 From every wight as fer as is the cloude
Tr 3 434 He was, so wel dissimilen he koude.
Tr 3 435 And al the while which that I yow devyse,
Tr 3 436 This was his lif: with all his fulle myght,
Tr 3 437 By day, he was in Martes heigh servyse —
Tr 3 438 This is to seyn, in armes as a knyght;
Tr 3 439 And for the more part, the longe nyght
Tr 3 440 He lay and thoughte how that he myghte serve
Tr 3 441 His lady best, hire thonk for to deserve.
Tr 3 442 Nil I naught swere, although he lay ful softe,
Tr 3 443 That in his thought he nas somwhat disesed,
Tr 3 444 Ne that he torned on his pilwes ofte,
Tr 3 445 And wold of that hym missed han ben sesed.
Tr 3 446 But in swich cas men is nought alwey plesed,
Tr 3 447 For aught I woot, namore than was he;
Tr 3 448 That kan I deme of possibilitee.
Tr 3 449 But certeyn is, to purpos for to go,
Tr 3 450 That in this while, as writen is in geeste,
Tr 3 451 He say his lady somtyme, and also
Tr 3 452 She with hym spak, whan that she dorst or leste;
Tr 3 453 And by hire bothe avys, as was the beste,
Tr 3 454 Apoynteden full warly in this nede,
Tr 3 455 So as they durste, how they wolde procede.
Tr 3 456 But it was spoken in so short a wise,
Tr 3 457 In swich await alwey, and in swich feere,
Tr 3 458 Lest any wight devynen or devyse
Tr 3 459 Wolde of hem two, or to it laye an ere,
Tr 3 460 That al this world so leef to hem ne were
Tr 3 461 As that Cupide wolde hem grace sende
Tr 3 462 To maken of hire speche aright an ende.
Tr 3 463 But thilke litel that they spake or wroughte,
Tr 3 464 His wise goost took ay of al swych heede,
Tr 3 465 It semed hire he wiste what she thoughte
Tr 3 466 Withouten word, so that it was no nede
Tr 3 467 To bidde hym ought to doon, or ought forbeede;
Tr 3 468 For which she thought that love, al come it late,
Tr 3 469 Of alle joie hadde opned hire the yate.
Tr 3 470 And shortly of this proces for to pace,
Tr 3 471 So wel his werk and wordes he bisette,
Tr 3 472 That he so ful stood in his lady grace,
Tr 3 473 That twenty thousand tymes, er she lette,
Tr 3 474 She thonked God that evere she with hym mette.
Tr 3 475 So koude he hym governe in swich servyse,
Tr 3 476 That al the world ne myght it bet devyse.
Tr 3 477 For whi she fond hym so discret in al,
Tr 3 478 So secret, and of swich obeisaunce,
Tr 3 479 That wel she felte he was to hire a wal
Tr 3 480 Of stiel, and sheld from every displesaunce;
Tr 3 481 That to ben in his goode governaunce,
Tr 3 482 So wis he was, she was namore afered —
Tr 3 483 I mene, as fer as oughte ben requered.
Tr 3 484 And Pandarus, to quike alwey the fir,
Tr 3 485 Was evere ylike prest and diligent;
Tr 3 486 To ese his frend was set al his desir.
Tr 3 487 He shof ay on, he to and fro was sent;
Tr 3 488 He lettres bar whan Troilus was absent;
Tr 3 489 That nevere man, as in his frendes nede,
Tr 3 490 Ne bar hym bet than he, withouten drede.
Tr 3 491 But now, paraunter, som man wayten wolde
Tr 3 492 That every word, or soonde, or look, or cheere
Tr 3 493 Of Troilus that I rehercen sholde,
Tr 3 494 In al this while unto his lady deere —
Tr 3 495 I trowe it were a long thyng for to here —
Tr 3 496 Or of what wight that stant in swich disjoynte,
Tr 3 497 His wordes alle, or every look, to poynte.
Tr 3 498 For sothe, I have naught herd it don er this
Tr 3 499 In story non, ne no man here, I wene;
Tr 3 500 And though I wolde, I koude nought, ywys;
Tr 3 501 For ther was som epistel hem bitwene,
Tr 3 502 That wolde, as seyth myn autour, wel contene
Tr 3 503 Neigh half this book, of which hym liste nought write.
Tr 3 504 How sholde I thanne a lyne of it endite?
Tr 3 505 But to the grete effect: than sey I thus,
Tr 3 506 That stondyng in concord and in quiete,
Tr 3 507 Thise ilke two, Criseyde and Troilus,
Tr 3 508 As I have told, and in this tyme swete —
Tr 3 509 Save only often myghte they nought mete,
Tr 3 510 Ne leiser have hire speches to fulfelle —
Tr 3 511 That it bifel right as I shal yow telle:
Tr 3 512 That Pandarus, that evere dide his myght
Tr 3 513 Right for the fyn that I shal speke of here,
Tr 3 514 As for to bryngen to his hows som nyght
Tr 3 515 His faire nece and Troilus yfere,
Tr 3 516 Wheras at leiser al this heighe matere,
Tr 3 517 Touchyng here love, were at the fulle upbounde,
Tr 3 518 Hadde out of doute a tyme to it founde.
Tr 3 519 For he with gret deliberacioun
Tr 3 520 Hadde every thyng that herto myght availle
Tr 3 521 Forncast and put in execucioun,
Tr 3 522 And neither left for cost ne for travaille.
Tr 3 523 Come if hem list, hem sholde no thyng faille;
Tr 3 524 And for to ben in ought aspied there,
Tr 3 525 That, wiste he wel, an impossible were.
Tr 3 526 Dredeles, it cler was in the wynd
Tr 3 527 Of every pie and every lette-game;
Tr 3 528 Now al is wel, for al the world is blynd
Tr 3 529 In this matere, bothe fremde and tame.
Tr 3 530 This tymbur is al redy up to frame;
Tr 3 531 Us lakketh nought but that we witen wolde
Tr 3 532 A certeyn houre, in which she comen sholde.
Tr 3 533 And Troilus, that al this purveiaunce
Tr 3 534 Knew at the fulle, and waited on it ay,
Tr 3 535 Hadde hereupon ek mad gret ordinaunce,
Tr 3 536 And found his cause, and therto his aray,
Tr 3 537 If that he were missed, nyght or day,
Tr 3 538 Ther-while he was aboute this servyse,
Tr 3 539 That he was gon to don his sacrifise,
Tr 3 540 And moste at swich a temple allone wake,
Tr 3 541 Answered of Apollo for to be;
Tr 3 542 And first to sen the holy laurer quake,
Tr 3 543 Er that Apollo spak out of the tree,
Tr 3 544 To telle hym next whan Grekes sholde flee —
Tr 3 545 And forthy lette hym no man, God forbede,
Tr 3 546 But prey Apollo helpen in this nede.
Tr 3 547 Now is ther litel more for to doone,
Tr 3 548 But Pandare up and, shortly for to seyne,
Tr 3 549 Right sone upon the chaungynge of the moone,
Tr 3 550 Whan lightles is the world a nyght or tweyne,
Tr 3 551 And that the wolken shop hym for to reyne,
Tr 3 552 He streght o morwe unto his nece wente —
Tr 3 553 Ye han wel herd the fyn of his entente.
Tr 3 554 Whan he was com, he gan anon to pleye
Tr 3 555 As he was wont, and of hymself to jape;
Tr 3 556 And finaly he swor and gan hire seye,
Tr 3 557 By this and that, she sholde hym nought escape,
Tr 3 558 Ne lenger don hym after hire to cape;
Tr 3 559 But certeynly she moste, by hire leve,
Tr 3 560 Come soupen in his hous with hym at eve.
Tr 3 561 At which she lough, and gan hire faste excuse,
Tr 3 562 And seyde, “It reyneth. lo, how sholde I gon?”
Tr 3 563 “Lat be,” quod he, “ne stant nought thus to muse.
Tr 3 564 This moot be don! Ye shal be ther anon.”
Tr 3 565 So at the laste herof they fille aton,
Tr 3 566 Or elles, softe he swor hire in hire ere,
Tr 3 567 He nolde nevere comen ther she were.
Tr 3 568 Soone after this, she to hym gan to rowne,
Tr 3 569 And axed hym if Troilus were there.
Tr 3 570 He swor hire nay, for he was out of towne,
Tr 3 571 And seyde, “Nece, I pose that he were;
Tr 3 572 Yow thurste nevere han the more fere;
Tr 3 573 For rather than men myghte hym ther aspie,
Tr 3 574 Me were levere a thousand fold to dye.”
Tr 3 575 Nought list myn auctour fully to declare
Tr 3 576 What that she thoughte whan he seyde so,
Tr 3 577 That Troilus was out of towne yfare,
Tr 3 578 As if he seyde therof soth or no;
Tr 3 579 But that, withowten await, with hym to go,
Tr 3 580 She graunted hym, sith he hire that bisoughte,
Tr 3 581 And, as his nece, obeyed as hire oughte.
Tr 3 582 But natheles, yet gan she hym biseche,
Tr 3 583 Although with hym to gon it was no fere,
Tr 3 584 For to ben war of goosissh poeples speche,
Tr 3 585 That dremen thynges whiche as nevere were,
Tr 3 586 And wel avyse hym whom he broughte there;
Tr 3 587 And seyde hym, “Em, syn I moste on yow triste,
Tr 3 588 Loke al be wel, and do now as yow liste.”
Tr 3 589 He swor hire yis, by stokkes and by stones,
Tr 3 590 And by the goddes that in hevene dwelle,
Tr 3 591 Or elles were hym levere, soule and bones,
Tr 3 592 With Pluto kyng as depe ben in helle
Tr 3 593 As Tantalus — what sholde I more telle?
Tr 3 594 Whan al was wel, he roos and took his leve,
Tr 3 595 And she to soper com, whan it was eve,
Tr 3 596 With a certein of hire owen men,
Tr 3 597 And with hire faire nece Antigone,
Tr 3 598 And other of hire wommen nyne or ten.
Tr 3 599 But who was glad now, who, as trowe ye,
Tr 3 600 But Troilus, that stood and myght it se
Tr 3 601 Thorughout a litel wyndow in a stewe,
Tr 3 602 Ther he bishet syn mydnyght was in mewe,
Tr 3 603 Unwist of every wight but of Pandare?
Tr 3 604 But to the point: now whan that she was come,
Tr 3 605 With alle joie and alle frendes fare
Tr 3 606 Hire em anon in armes hath hire nome,
Tr 3 607 And after to the soper, alle and some,
Tr 3 608 Whan tyme was, ful softe they hem sette.
Tr 3 609 God woot, ther was no deynte for to fette!
Tr 3 610 And after soper gonnen they to rise,
Tr 3 611 At ese wel, with herte fresshe and glade;
Tr 3 612 And wel was hym that koude best devyse
Tr 3 613 To liken hire, or that hire laughen made:
Tr 3 614 He song; she pleyde; he tolde tale of Wade.
Tr 3 615 But at the laste, as every thyng hath ende,
Tr 3 616 She took hire leve, and nedes wolde wende.
Tr 3 617 But O Fortune, executrice of wierdes,
Tr 3 618 O influences of thise hevenes hye!
Tr 3 619 Soth is, that under God ye ben oure hierdes,
Tr 3 620 Though to us bestes ben the causez wrie.
Tr 3 621 This mene I now: for she gan homward hye,
Tr 3 622 But execut was al bisyde hire leve
Tr 3 623 The goddes wil, for which she moste bleve.
Tr 3 624 The bente moone with hire hornes pale,
Tr 3 625 Saturne, and Jove, in Cancro joyned were,
Tr 3 626 That swych a reyn from heven gan avale
Tr 3 627 That every maner womman that was there
Tr 3 628 Hadde of that smoky reyn a verray feere;
Tr 3 629 At which Pandare tho lough, and seyde thenne,
Tr 3 630 “Now were it tyme a lady to gon henne!
Tr 3 631 “But goode nece, if I myghte evere plese
Tr 3 632 Yow any thyng, than prey ich yow,” quod he,
Tr 3 633 “To don myn herte as now so gret an ese
Tr 3 634 As for to dwelle here al this nyght with me,
Tr 3 635 For-whi this is youre owen hous, parde.
Tr 3 636 For by my trouthe, I sey it nought a-game,
Tr 3 637 To wende as now, it were to me a shame.”
Tr 3 638 Criseyde, which that koude as muche good
Tr 3 639 As half a world, took hede of his preiere;
Tr 3 640 And syn it ron, and al was on a flod,
Tr 3 641 She thoughte, “As good chep may I dwellen here,
Tr 3 642 And graunte it gladly with a frendes chere,
Tr 3 643 And have a thonk, as grucche and thanne abide;
Tr 3 644 For hom to gon, it may nought wel bitide.”
Tr 3 645 “I wol,” quod she, “myn uncle lief and deere;
Tr 3 646 Syn that yow list, it skile is to be so.
Tr 3 647 I am right glad with yow to dwellen here;
Tr 3 648 I seyde but a-game I wolde go.”
Tr 3 649 “Iwys, graunt mercy, nece,” quod he tho,
Tr 3 650 “Were it a game or no, soth for to telle,
Tr 3 651 Now am I glad, syn that yow list to dwelle.”
Tr 3 652 Thus al is wel; but tho bigan aright
Tr 3 653 The newe joie and al the feste agayn.
Tr 3 654 But Pandarus, if goodly hadde he myght,
Tr 3 655 He wolde han hyed hire to bedde fayn,
Tr 3 656 And seyde, “Lord, this is an huge rayn!
Tr 3 657 This were a weder for to slepen inne —
Tr 3 658 And that I rede us soone to bygynne.
Tr 3 659 “And nece, woot ye wher I wol yow leye,
Tr 3 660 For that we shul nat liggen far asonder,
Tr 3 661 And for ye neither shullen, dar I seye,
Tr 3 662 Heren noyse of reynes nor of thonder?
Tr 3 663 By God, right in my litel closet yonder.
Tr 3 664 And I wol in that outer hous allone
Tr 3 665 Be wardein of youre wommen everichone.
Tr 3 666 “And in this myddel chambre that ye se
Tr 3 667 Shal youre wommen slepen, wel and softe;
Tr 3 668 And there I seyde shal youreselven be;
Tr 3 669 And if ye liggen wel to-nyght, com ofte,
Tr 3 670 And careth nought what weder is alofte.
Tr 3 671 The wyn anon, and whan so that yow leste,
Tr 3 672 So go we slepe: I trowe it be the beste.”
Tr 3 673 Ther nys no more, but hereafter soone,
Tr 3 674 The voide dronke, and travers drawe anon,
Tr 3 675 Gan every wight that hadde nought to done
Tr 3 676 More in the place out of the chaumbre gon.
Tr 3 677 And evere mo so sterneliche it ron,
Tr 3 678 And blew therwith so wondirliche loude,
Tr 3 679 That wel neigh no man heren other koude.
Tr 3 680 Tho Pandarus, hire em, right as hym oughte,
Tr 3 681 With wommen swiche as were hire most aboute,
Tr 3 682 Ful glad unto hire beddes syde hire broughte,
Tr 3 683 And took his leve, and gan ful lowe loute,
Tr 3 684 And seyde, “Here at this closet dore withoute,
Tr 3 685 Right overthwart, youre wommen liggen alle,
Tr 3 686 That whom yow list of hem ye may here calle.”
Tr 3 687 So whan that she was in the closet leyd,
Tr 3 688 And alle hire wommen forth by ordinaunce
Tr 3 689 Abedde weren, ther as I have seyd,
Tr 3 690 Ther was nomore to skippen nor to traunce,
Tr 3 691 But boden go to bedde, with meschaunce,
Tr 3 692 If any wight was steryng anywhere,
Tr 3 693 And lat hem slepen that abedde were.
Tr 3 694 But Pandarus, that wel koude ech a deel
Tr 3 695 Th’ olde daunce, and every point therinne,
Tr 3 696 Whan that he sey that alle thyng was wel,
Tr 3 697 He thought he wolde upon his werk bigynne,
Tr 3 698 And gan the stuwe doore al softe unpynne;
Tr 3 699 And stille as stoon, withouten lenger lette,
Tr 3 700 By Troilus adown right he hym sette,
Tr 3 701 And shortly to the point right for to gon,
Tr 3 702 Of al this werk he tolde hym word and ende,
Tr 3 703 And seyde, “Make the redy right anon,
Tr 3 704 For thow shalt into hevene blisse wende.”
Tr 3 705 “Now, blisful Venus, thow me grace sende!”
Tr 3 706 Quod Troilus, “For nevere yet no nede
Tr 3 707 Hadde ich er now, ne halvendel the drede.”
Tr 3 708 Quod Pandarus, “Ne drede the nevere a deel,
Tr 3 709 For it shal be right as thow wolt desire;
Tr 3 710 So thryve I, this nyght shal I make it weel,
Tr 3 711 Or casten al the gruwel in the fire.”
Tr 3 712 “Yet, blisful Venus, this nyght thow me enspire,”
Tr 3 713 Quod Troilus, “As wys as I the serve,
Tr 3 714 And evere bet and bet shal, til I sterve.
Tr 3 715 “And if ich hadde, O Venus ful of myrthe,
Tr 3 716 Aspectes badde of Mars or of Saturne,
Tr 3 717 Or thow combust or let were in my birthe,
Tr 3 718 Thy fader prey al thilke harm disturne
Tr 3 719 Of grace, and that I glad ayein may turne,
Tr 3 720 For love of hym thow lovedest in the shawe —
Tr 3 721 I meene Adoun, that with the boor was slawe.
Tr 3 722 “O Jove ek, for the love of faire Europe,
Tr 3 723 The which in forme of bole awey thow fette,
Tr 3 724 Now help! O Mars, thow with thi blody cope,
Tr 3 725 For love of Cipris, thow me nought ne lette!
Tr 3 726 O Phebus, thynk whan Dane hireselven shette
Tr 3 727 Under the bark, and laurer wax for drede;
Tr 3 728 Yet for hire love, O help now at this nede!
Tr 3 729 “Mercurie, for the love of Hierse eke,
Tr 3 730 For which Pallas was with Aglawros wroth,
Tr 3 731 Now help! And ek Diane, I the biseke
Tr 3 732 That this viage be nought to the looth!
Tr 3 733 O fatal sustren which, er any cloth
Tr 3 734 Me shapen was, my destine me sponne,
Tr 3 735 So helpeth to this werk that is bygonne!”
Tr 3 736 Quod Pandarus, “Thow wrecched mouses herte,
Tr 3 737 Artow agast so that she wol the bite?
Tr 3 738 Wy! Don this furred cloke upon thy sherte,
Tr 3 739 And folwe me, for I wol have the wite.
Tr 3 740 But bid, and lat me gon biforn a lite.”
Tr 3 741 And with that word he gan undon a trappe,
Tr 3 742 And Troilus he brought in by the lappe.
Tr 3 743 The sterne wynd so loude gan to route
Tr 3 744 That no wight oother noise myghte heere;
Tr 3 745 And they that layen at the dore withoute,
Tr 3 746 Ful sikerly they slepten alle yfere;
Tr 3 747 And Pandarus, with a ful sobre cheere,
Tr 3 748 Goth to the dore anon, withouten lette,
Tr 3 749 Ther as they laye, and softely it shette.
Tr 3 750 And as he com ayeynward pryvely,
Tr 3 751 His nece awook, and axed, “Who goth there?”
Tr 3 752 “My dere nece,” quod he, “it am I.
Tr 3 753 Ne wondreth nought, ne have of it no fere.”
Tr 3 754 And ner he com and seyde hire in hire ere,
Tr 3 755 “No word, for love of God, I yow biseche!
Tr 3 756 Lat no wight risen and heren of oure speche.”
Tr 3 757 “What, which wey be ye comen, benedicite?”
Tr 3 758 Quod she; “And how, unwist of hem alle?”
Tr 3 759 “Here at this secre trappe-dore,” quod he.
Tr 3 760 Quod tho Criseyde, “Lat me som wight calle!”
Tr 3 761 “I! God forbede that it sholde falle,”
Tr 3 762 Quod Pandarus, “that ye swich folye wroughte!
Tr 3 763 They myghte demen thyng they nevere er thoughte.
Tr 3 764 “It is nought good a slepyng hound to wake,
Tr 3 765 Ne yeve a wight a cause to devyne:
Tr 3 766 Youre wommen slepen alle, I undertake,
Tr 3 767 So that, for hem, the hous men myghte myne,
Tr 3 768 And slepen wollen til the sonne shyne.
Tr 3 769 And whan my tale brought is to an ende,
Tr 3 770 Unwist, right as I com, so wol I wende.
Tr 3 771 “Now, nece myn, ye shul wel understonde,”
Tr 3 772 Quod he, “so as ye wommen demen alle,
Tr 3 773 That for to holde in love a man in honde,
Tr 3 774 And hym hire lief and deere herte calle,
Tr 3 775 And maken hym an howve above a calle —
Tr 3 776 I meene, as love another in this while —
Tr 3 777 She doth hireself a shame and hym a gyle.
Tr 3 778 “Now, wherby that I telle yow al this:
Tr 3 779 Ye woot youreself, as wel as any wight,
Tr 3 780 How that youre love al fully graunted is
Tr 3 781 To Troilus, the worthieste knyght,
Tr 3 782 Oon of this world, and therto trouthe yplight,
Tr 3 783 That, but it were on hym along, ye nolde
Tr 3 784 Hym nevere falsen while ye lyven sholde.
Tr 3 785 “Now stant it thus, that sith I fro yow wente,
Tr 3 786 This Troilus, right platly for to seyn,
Tr 3 787 Is thorugh a goter, by a pryve wente,
Tr 3 788 Into my chaumbre come in al this reyn,
Tr 3 789 Unwist of every manere wight, certeyn,
Tr 3 790 Save of myself, as wisly have I joye,
Tr 3 791 And by that feith I shal Priam of Troie.
Tr 3 792 “And he is come in swich peyne and distresse
Tr 3 793 That, but he be al fully wood by this,
Tr 3 794 He sodeynly mot falle into wodnesse,
Tr 3 795 But if God helpe; and cause whi this is.
Tr 3 796 He seith hym told is of a frend of his,
Tr 3 797 How that ye sholden love oon hatte Horaste;
Tr 3 798 For sorwe of which this nyght shal ben his laste.”
Tr 3 799 Criseyde, which that al this wonder herde,
Tr 3 800 Gan sodeynly aboute hire herte colde,
Tr 3 801 And with a sik she sorwfully answerde,
Tr 3 802 “Allas! I wende, whoso tales tolde,
Tr 3 803 My deere herte wolde me nought holde
Tr 3 804 So lightly fals! Allas, conceytes wronge,
Tr 3 805 What harm they don! For now lyve I to longe!
Tr 3 806 “Horaste! Allas, and falsen Troilus?
Tr 3 807 I knowe hym nought, God helpe me so!” quod she.
Tr 3 808 “Allas, what wikked spirit tolde hym thus?
Tr 3 809 Now certes, em, tomorwe and I hym se,
Tr 3 810 I shal therof as ful excusen me,
Tr 3 811 As evere dide womman, if hym like.”
Tr 3 812 And with that word she gan ful soore sike.
Tr 3 813 “O God,” quod she, “so worldly selynesse,
Tr 3 814 Which clerkes callen fals felicitee,
Tr 3 815 Imedled is with many a bitternesse!
Tr 3 816 Ful angwissous than is, God woot,” quod she,
Tr 3 817 “Condicioun of veyn prosperitee:
Tr 3 818 For either joies comen nought yfeere,
Tr 3 819 Or elles no wight hath hem alwey here.
Tr 3 820 “O brotel wele of mannes joie unstable!
Tr 3 821 With what wight so thow be, or how thow pleye,
Tr 3 822 Either he woot that thow, joie, art muable,
Tr 3 823 Or woot it nought; it mot ben oon of tweye.
Tr 3 824 Now if he woot it nought, how may he seye
Tr 3 825 That he hath verray joie and selynesse,
Tr 3 826 That is of ignoraunce ay in derknesse?
Tr 3 827 “Now if he woot that joie is transitorie,
Tr 3 828 As every joye of worldly thyng mot flee,
Tr 3 829 Than every tyme he that hath in memorie,
Tr 3 830 The drede of lesyng maketh hym that he
Tr 3 831 May in no perfit selynesse be;
Tr 3 832 And if to lese his joie he sette a myte,
Tr 3 833 Than semeth it that joie is worth ful lite.
Tr 3 834 “Wherfore I wol diffyne in this matere,
Tr 3 835 That trewely, for aught I kan espie,
Tr 3 836 Ther is no verray weele in this world heere.
Tr 3 837 But O thow wikked serpent, jalousie,
Tr 3 838 Thow mysbyleved envyous folie,
Tr 3 839 Why hastow Troilus mad to me untriste,
Tr 3 840 That nevere yet agylte hym, that I wiste?”
Tr 3 841 Quod Pandarus, “Thus fallen is this cas –“
Tr 3 842 “Wy! Uncle myn,” quod she, “who tolde hym this?
Tr 3 843 Why doth my deere herte thus, allas?”
Tr 3 844 “Ye woot, ye, nece myn,” quod he, “what is.
Tr 3 845 I hope al shal be wel that is amys,
Tr 3 846 For ye may quenche al this, if that yow leste —
Tr 3 847 And doth right so, for I holde it the beste.”
Tr 3 848 “So shal I do to-morwe, ywys,” quod she,
Tr 3 849 “And God toforn, so that it shal suffise.”
Tr 3 850 “To-morwe? Allas, that were a fair!” quod he;
Tr 3 851 “Nay, nay, it may nat stonden in this wise,
Tr 3 852 For, nece myn, thus writen clerkes wise,
Tr 3 853 That peril is with drecchyng in ydrawe;
Tr 3 854 Nay, swiche abodes ben nought worth an hawe.
Tr 3 855 “Nece, alle thyng hath tyme, I dar avowe;
Tr 3 856 For whan a chaumbre afire is or an halle,
Tr 3 857 Wel more nede is, it sodeynly rescowe
Tr 3 858 Than to dispute and axe amonges alle
Tr 3 859 How this candel in the strawe is falle.
Tr 3 860 A, benedicite! For al among that fare
Tr 3 861 The harm is don, and fare-wel feldefare!
Tr 3 862 “And nece myn — ne take it naught agrief —
Tr 3 863 If that ye suffre hym al nyght in this wo,
Tr 3 864 God help me so, ye hadde hym nevere lief!
Tr 3 865 That dar I seyn, now ther is but we two.
Tr 3 866 But wel I woot that ye wol nat do so;
Tr 3 867 Ye ben to wys to doon so gret folie,
Tr 3 868 To putte his lif al nyght in jupertie.”
Tr 3 869 “Hadde I hym nevere lief? by God, I weene
Tr 3 870 Ye hadde nevere thyng so lief!” quod she.
Tr 3 871 “Now by my thrift,” quod he, “that shal be seene!
Tr 3 872 For syn ye make this ensaumple of me,
Tr 3 873 If ich al nyght wolde hym in sorwe se,
Tr 3 874 For al the tresour in the town of Troie,
Tr 3 875 I bidde God I nevere mote have joie.
Tr 3 876 “Now loke thanne, if ye that ben his love
Tr 3 877 Shul putte his lif al night in jupertie
Tr 3 878 For thyng of nought, now by that God above,
Tr 3 879 Naught oonly this delay comth of folie,
Tr 3 880 But of malice, if that I shal naught lie.
Tr 3 881 What! Platly, and ye suffre hym in destresse,
Tr 3 882 Ye neyther bounte don ne gentilesse.”
Tr 3 883 Quod tho Criseyde, “Wol ye don o thyng
Tr 3 884 And ye therwith shal stynte al his disese?
Tr 3 885 Have heere, and bereth hym this blewe ryng,
Tr 3 886 For ther is nothyng myghte hym bettre plese,
Tr 3 887 Save I myself, ne more hys herte apese;
Tr 3 888 And sey my deere herte that his sorwe
Tr 3 889 Is causeles; that shal be sene to-morwe.”
Tr 3 890 “A ryng?” quod he, “Ye haselwodes shaken!
Tr 3 891 Ye, nece myn, that ryng moste han a stoon
Tr 3 892 That myghte dede men alyve maken;
Tr 3 893 And swich a ryng trowe I that ye have non.
Tr 3 894 Discrecioun out of youre hed is gon;
Tr 3 895 That fele I now,” quod he, “and that is routhe.
Tr 3 896 O tyme ilost, wel maistow corsen slouthe!
Tr 3 897 “Woot ye not wel that noble and heigh corage
Tr 3 898 Ne sorweth nought, ne stynteth ek, for lite?
Tr 3 899 But if a fool were in a jalous rage,
Tr 3 900 I nolde setten at his sorwe a myte,
Tr 3 901 But feffe hym with a fewe wordes white
Tr 3 902 Anothir day, whan that I myghte hym fynde;
Tr 3 903 But this thyng stant al in another kynde.
Tr 3 904 “This is so gentil and so tendre of herte
Tr 3 905 That with his deth he wol his sorwes wreke;
Tr 3 906 For trusteth wel, how sore that hym smerte,
Tr 3 907 He wol to yow no jalous wordes speke.
Tr 3 908 And forthi, nece, er that his herte breke,
Tr 3 909 So speke youreself to hym of this matere,
Tr 3 910 For with o word ye may his herte stere.
Tr 3 911 “Now have I told what peril he is inne,
Tr 3 912 And his comynge unwist is to every wight;
Tr 3 913 Ne, parde, harm may ther be non, ne synne:
Tr 3 914 I wol myself be with yow al this nyght.
Tr 3 915 Ye knowe ek how it is youre owen knyght,
Tr 3 916 And that bi right ye moste upon hym triste,
Tr 3 917 And I al prest to fecche hym whan yow liste.”
Tr 3 918 This accident so pitous was to here,
Tr 3 919 And ek so like a sooth at prime face,
Tr 3 920 And Troilus hire knyght to hir so deere,
Tr 3 921 His prive comyng, and the siker place,
Tr 3 922 That though that she did hym as thanne a grace,
Tr 3 923 Considered alle thynges as they stoode,
Tr 3 924 No wonder is, syn she did al for goode.
Tr 3 925 Criseyde answerde, “As wisly God at reste
Tr 3 926 My soule brynge, as me is for hym wo!
Tr 3 927 And em, iwis, fayn wolde I don the beste,
Tr 3 928 If that ich hadde grace to do so;
Tr 3 929 But whether that ye dwelle or for hym go,
Tr 3 930 I am, til God me bettre mynde sende,
Tr 3 931 At dulcarnoun, right at my wittes ende.”
Tr 3 932 Quod Pandarus, “Yee, nece, wol ye here?
Tr 3 933 Dulcarnoun called is ‘flemyng of wrecches’:
Tr 3 934 It semeth hard, for wrecches wol nought lere,
Tr 3 935 For verray slouthe or other wilfull tecches;
Tr 3 936 This seyd by hem that ben nought worth two fecches;
Tr 3 937 But ye ben wis, and that we han on honde
Tr 3 938 Nis neither hard, ne skilful to withstonde.”
Tr 3 939 “Than, em,” quod she, “doth herof as yow list.
Tr 3 940 But er he com, I wil up first arise,
Tr 3 941 And for the love of God, syn al my trist
Tr 3 942 Is on yow two, and ye ben bothe wise,
Tr 3 943 So werketh now in so discret a wise
Tr 3 944 That I honour may have, and he plesaunce:
Tr 3 945 For I am here al in youre governaunce.”
Tr 3 946 “That is wel seyd,” quod he, “my nece deere.
Tr 3 947 Ther good thrift on that wise gentil herte!
Tr 3 948 But liggeth stille, and taketh hym right here —
Tr 3 949 It nedeth nought no ferther for hym sterte.
Tr 3 950 And ech of yow ese otheres sorwes smerte,
Tr 3 951 For love of God! And Venus, I the herye;
Tr 3 952 For soone hope I we shul ben alle merye.”
Tr 3 953 This Troilus ful soone on knees hym sette
Tr 3 954 Ful sobrely, right be hyre beddes hed,
Tr 3 955 And in his beste wyse his lady grette.
Tr 3 956 But Lord, so she wex sodeynliche red!
Tr 3 957 Ne though men sholde smyten of hire hed,
Tr 3 958 She kouth. nought a word aright out brynge
Tr 3 959 So sodeynly, for his sodeyn comynge.
Tr 3 960 But Pandarus, that so wel koude feele
Tr 3 961 In every thyng, to pleye anon bigan,
Tr 3 962 And seyde, “Nece, se how this lord kan knele!
Tr 3 963 Now for youre trouthe, se this gentil man!”
Tr 3 964 And with that word he for a quysshen ran,
Tr 3 965 And seyde, “Kneleth now, while that yow leste;
Tr 3 966 There God youre hertes brynge soone at reste!”
Tr 3 967 Kan I naught seyn, for she bad hym nought rise,
Tr 3 968 If sorwe it putte out of hire remembraunce,
Tr 3 969 Or elles that she took it in the wise
Tr 3 970 Of dewete, as for his observaunce;
Tr 3 971 But wel fynde I she dede hym this plesaunce,
Tr 3 972 That she hym kiste, although she siked sore,
Tr 3 973 And bad hym sitte adown withouten more.
Tr 3 974 Quod Pandarus, “Now wol ye wel bigynne.
Tr 3 975 Now doth hym sitte, goode nece deere,
Tr 3 976 Upon youre beddes syde al ther withinne,
Tr 3 977 That ech of yow the bet may other heere.”
Tr 3 978 And with that word he drow hym to the feere,
Tr 3 979 And took a light, and fond his contenaunce,
Tr 3 980 As for to looke upon an old romaunce.
Tr 3 981 Criseyde, that was Troilus lady right,
Tr 3 982 And cler stood on a ground of sikernesse,
Tr 3 983 Al thoughte she hire servant and hire knyght
Tr 3 984 Ne sholde of right non untrouthe in hire gesse,
Tr 3 985 Yet natheles, considered his distresse,
Tr 3 986 And that love is in cause of swich folie,
Tr 3 987 Thus to hym spak she of his jalousie:
Tr 3 988 “Lo, herte myn, as wolde the excellence
Tr 3 989 Of love, ayeins the which that no man may —
Tr 3 990 Ne oughte ek — goodly make resistence,
Tr 3 991 And ek bycause I felte wel and say
Tr 3 992 Youre grete trouthe and servise every day,
Tr 3 993 And that youre herte al myn was, soth to seyne,
Tr 3 994 This drof me for to rewe upon youre peyne.
Tr 3 995 “And youre goodnesse have I founde alwey yit,
Tr 3 996 Of which, my deere herte and al my knyght,
Tr 3 997 I thonke it yow, as fer as I have wit,
Tr 3 998 Al kan I nought as muche as it were right;
Tr 3 999 And I, emforth my connyng and my might,
Tr 3 1000 Have and ay shal, how sore that me smerte,
Tr 3 1001 Ben to yow trewe and hool with al myn herte,
Tr 3 1002 “And dredeles, that shal be founde at preve.
Tr 3 1003 But, herte myn, what al this is to seyne
Tr 3 1004 Shal wel be told, so that ye nought yow greve,
Tr 3 1005 Though I to yow right on youreself compleyne,
Tr 3 1006 For therwith mene I fynaly the peyne
Tr 3 1007 That halt youre herte and myn in hevynesse
Tr 3 1008 Fully to slen, and every wrong redresse.
Tr 3 1009 “My goode myn, noot I for-why ne how
Tr 3 1010 That jalousie, allas, that wikked wyvere,
Tr 3 1011 Thus causeles is cropen into yow,
Tr 3 1012 The harm of which I wolde fayn delyvere.
Tr 3 1013 Allas, that he, al hool or of hym slyvere,
Tr 3 1014 Shuld han his refut in so digne a place;
Tr 3 1015 Ther Jove hym sone out of youre herte arace!
Tr 3 1016 “But O, thow Jove, O auctour of nature,
Tr 3 1017 Is this an honour to thi deyte,
Tr 3 1018 That folk ungiltif suffren hire injure,
Tr 3 1019 And who that giltif is, al quyt goth he?
Tr 3 1020 O, were it lefull for to pleyn on the,
Tr 3 1021 That undeserved suffrest jalousie,
Tr 3 1022 Of that I wolde upon the pleyne and crie!
Tr 3 1023 “Ek al my wo is this, that folk now usen
Tr 3 1024 To seyn right thus, ‘Ye, jalousie is love!’
Tr 3 1025 And wolde a busshel venym al excusen,
Tr 3 1026 For that o greyn of love is on it shove.
Tr 3 1027 But that woot heighe God that sit above,
Tr 3 1028 If it be likkere love, or hate, or grame;
Tr 3 1029 And after that, it oughte bere his name.
Tr 3 1030 “But certeyn is, som manere jalousie
Tr 3 1031 Is excusable more than som, iwys;
Tr 3 1032 As whan cause is, and som swich fantasie
Tr 3 1033 With piete so wel repressed is
Tr 3 1034 That it unnethe doth or seyth amys,
Tr 3 1035 But goodly drynketh up al his distresse —
Tr 3 1036 And that excuse I, for the gentilesse;
Tr 3 1037 “And som so ful of furie is and despit
Tr 3 1038 That it sourmounteth his repressioun.
Tr 3 1039 But herte myn, ye be nat in that plit,
Tr 3 1040 That thonke I God; for which youre passioun
Tr 3 1041 I wol nought calle it but illusioun
Tr 3 1042 Of habundaunce of love and besy cure,
Tr 3 1043 That doth youre herte this disese endure.
Tr 3 1044 “Of which I am right sory but nought wroth;
Tr 3 1045 But, for my devoir and youre hertes reste,
Tr 3 1046 Wherso yow list, by ordal or by oth,
Tr 3 1047 By sort, or in what wise so yow leste,
Tr 3 1048 For love of God, lat preve it for the beste;
Tr 3 1049 And if that I be giltif, do me deye!
Tr 3 1050 Allas, what myght I more don or seye?”
Tr 3 1051 With that a fewe brighte teris newe
Tr 3 1052 Owt of hire eighen fille, and thus she seyde,
Tr 3 1053 “Now God, thow woost, in thought ne dede untrewe
Tr 3 1054 To Troilus was nevere yet Criseyde.”
Tr 3 1055 With that here heed down in the bed she leyde,
Tr 3 1056 And with the sheete it wreigh, and sighte soore,
Tr 3 1057 And held hire pees; nought o word spak she more.
Tr 3 1058 But now help God to quenchen al this sorwe!
Tr 3 1059 So hope I that he shal, for he best may.
Tr 3 1060 For I have seyn of a ful misty morwe
Tr 3 1061 Folowen ful ofte a myrie someris day;
Tr 3 1062 And after wynter foloweth grene May;
Tr 3 1063 Men sen alday, and reden ek in stories,
Tr 3 1064 That after sharpe shoures ben victories.
Tr 3 1065 This Troilus, whan he hire wordes herde,
Tr 3 1066 Have ye no care, hym liste nought to slepe;
Tr 3 1067 For it thoughte hym no strokes of a yerde
Tr 3 1068 To heere or seen Criseyde, his lady, wepe;
Tr 3 1069 But wel he felt aboute his herte crepe,
Tr 3 1070 For everi tere which that Criseyde asterte,
Tr 3 1071 The crampe of deth to streyne hym by the herte.
Tr 3 1072 And in his mynde he gan the tyme acorse
Tr 3 1073 That he com there, and that, that he was born;
Tr 3 1074 For now is wikke torned into worse,
Tr 3 1075 And al that labour he hath don byforn,
Tr 3 1076 He wende it lost; he thoughte he nas but lorn.
Tr 3 1077 “O Pandarus,” thoughte he, “allas, thi wile
Tr 3 1078 Serveth of nought, so weylaway the while!”
Tr 3 1079 And therwithal he heng adown the heed,
Tr 3 1080 And fil on knees, and sorwfully he sighte.
Tr 3 1081 What myghte he seyn? He felte he nas but deed,
Tr 3 1082 For wroth was she that sholde his sorwes lighte.
Tr 3 1083 But natheles, whan that he speken myghte,
Tr 3 1084 Than seyde he thus, “God woot that of this game,
Tr 3 1085 Whan al is wist, than am I nought to blame.”
Tr 3 1086 Therwith the sorwe so his herte shette
Tr 3 1087 That from his eyen fil there nought a tere,
Tr 3 1088 And every spirit his vigour in knette,
Tr 3 1089 So they astoned or oppressed were.
Tr 3 1090 The felyng of his sorwe, or of his fere,
Tr 3 1091 Or of aught elles, fled was out of towne;
Tr 3 1092 And down he fel al sodeynly a-swowne.
Tr 3 1093 This was no litel sorwe for to se;
Tr 3 1094 But al was hust, and Pandare up as faste;
Tr 3 1095 “O nece, pes, or we be lost!” quod he,
Tr 3 1096 “Beth naught agast!” But certeyn, at the laste,
Tr 3 1097 For this or that, he into bed hym caste,
Tr 3 1098 And seyde, “O thef, is this a mannes herte?”
Tr 3 1099 And of he rente al to his bare sherte,
Tr 3 1100 And seyde, “Nece, but ye helpe us now,
Tr 3 1101 Allas, youre owen Troilus is lorn!”
Tr 3 1102 “Iwis, so wolde I, and I wiste how,
Tr 3 1103 Ful fayn,” quod she. “Allas, that I was born”!
Tr 3 1104 “Yee, nece, wol ye pullen out the thorn
Tr 3 1105 That stiketh in his herte?” quod Pandare.
Tr 3 1106 “Sey ‘Al foryeve,’ and stynt is al this fare!”
Tr 3 1107 “Ye, that to me,” quod she, “ful levere were
Tr 3 1108 Than al the good the sonne aboute gooth.”
Tr 3 1109 And therwithal she swor hym in his ere,
Tr 3 1110 “Iwys, my deere herte, I am nought wroth,
Tr 3 1111 Have here my trouthe!” — and many an other oth.
Tr 3 1112 “Now speke to me, for it am I, Criseyde!”
Tr 3 1113 But al for nought; yit myght he nought abreyde.
Tr 3 1114 Therwith his pous and paumes of his hondes
Tr 3 1115 They gan to frote, and wete his temples tweyne;
Tr 3 1116 And to deliveren hym fro bittre bondes
Tr 3 1117 She ofte hym kiste; and shortly for to seyne,
Tr 3 1118 Hym to revoken she did al hire peyne;
Tr 3 1119 And at the laste, he gan his breth to drawe,
Tr 3 1120 And of his swough sone after that adawe,
Tr 3 1121 And gan bet mynde and reson to hym take,
Tr 3 1122 But wonder soore he was abayst, iwis;
Tr 3 1123 And with a sik, whan he gan bet awake,
Tr 3 1124 He seyde, “O mercy, God, what thyng is this?”
Tr 3 1125 “Why do ye with youreselven thus amys?”
Tr 3 1126 Quod tho Criseyde, “Is this a mannes game?
Tr 3 1127 What, Troilus, wol ye do thus for shame?”
Tr 3 1128 And therwithal hire arm over hym she leyde,
Tr 3 1129 And al foryaf, and ofte tyme hym keste.
Tr 3 1130 He thonked hire, and to hire spak, and seyde
Tr 3 1131 As fil to purpos for his herte reste;
Tr 3 1132 And she to that answerde hym as hire leste,
Tr 3 1133 And with hire goodly wordes hym disporte
Tr 3 1134 She gan, and ofte his sorwes to comforte.
Tr 3 1135 Quod Pandarus, “For aught I kan aspien,
Tr 3 1136 This light, nor I, ne serven here of nought.
Tr 3 1137 Light is nought good for sike folkes yen!
Tr 3 1138 But, for the love of God, syn ye ben brought
Tr 3 1139 In thus good plit, lat now no hevy thought
Tr 3 1140 Ben hangyng in the hertes of yow tweye” —
Tr 3 1141 And bar the candel to the chymeneye.
Tr 3 1142 Soone after this, though it no nede were,
Tr 3 1143 Whan she swiche othes as hire leste devyse
Tr 3 1144 Hadde of hym take, hire thoughte tho no fere,
Tr 3 1145 Ne cause ek non to bidde hym thennes rise.
Tr 3 1146 Yet lasse thyng than othes may suffise
Tr 3 1147 In many a cas, for every wyght, I gesse,
Tr 3 1148 That loveth wel, meneth but gentilesse.
Tr 3 1149 But in effect she wolde wite anon
Tr 3 1150 Of what man, and ek wheer, and also why
Tr 3 1151 He jalous was, syn ther was cause non;
Tr 3 1152 And ek the sygne that he took it by,
Tr 3 1153 She badde hym that to telle hire bisily,
Tr 3 1154 Or elles, certeyn, she bar hym on honde
Tr 3 1155 That this was don of malice, hire to fonde.
Tr 3 1156 Withouten more, shortly for to seyne,
Tr 3 1157 He most obeye unto his lady heste;
Tr 3 1158 And for the lasse harm, he moste feyne.
Tr 3 1159 He seyde hire, whan she was at swich a feste,
Tr 3 1160 She myght on hym han loked at the leste —
Tr 3 1161 Noot I nought what, al deere ynough a rysshe,
Tr 3 1162 As he that nedes most a cause fisshe.
Tr 3 1163 And she answerde, “Swete, al were it so,
Tr 3 1164 What harm was that, syn I non yvel mene?
Tr 3 1165 For, by that God that bought us bothe two,
Tr 3 1166 In alle thyng is myn entente cleene.
Tr 3 1167 Swiche argumentes ne ben naught worth a beene.
Tr 3 1168 Wol ye the childissh jalous contrefete?
Tr 3 1169 Now were it worthi that ye were ybete.”
Tr 3 1170 Tho Troilus gan sorwfully to sike —
Tr 3 1171 Lest she be wroth, hym thoughte his herte deyde —
Tr 3 1172 And seyde, “Allas, upon my sorwes sike
Tr 3 1173 Have mercy, swete herte myn, Criseyde!
Tr 3 1174 And if that in tho wordes that I seyde
Tr 3 1175 Be any wrong, I wol no more trespace.
Tr 3 1176 Doth what yow list; I am al in youre grace.”
Tr 3 1177 And she answerde, “Of gilt misericorde!
Tr 3 1178 That is to seyn, that I foryeve al this;
Tr 3 1179 And evere more on this nyght yow recorde,
Tr 3 1180 And beth wel war ye do namore amys.”
Tr 3 1181 “Nay, dere herte myn,” quod he, “iwys!”
Tr 3 1182 “And now,” quod she, “that I have don yow smerte,
Tr 3 1183 Foryeve it me, myn owene swete herte.”
Tr 3 1184 This Troilus, with blisse of that supprised,
Tr 3 1185 Putte al in Goddes hand, as he that mente
Tr 3 1186 Nothing but wel; and sodeynly avysed,
Tr 3 1187 He hire in armes faste to hym hente.
Tr 3 1188 And Pandarus with a ful good entente
Tr 3 1189 Leyde hym to slepe, and seyde, “If ye be wise,
Tr 3 1190 Swouneth nought now, lest more folk arise!”
Tr 3 1191 What myghte or may the sely larke seye,
Tr 3 1192 Whan that the sperhauk hath it in his foot?
Tr 3 1193 I kan namore; but of thise ilke tweye —
Tr 3 1194 To whom this tale sucre be or soot —
Tr 3 1195 Though that I tarie a yer, somtyme I moot,
Tr 3 1196 After myn auctour, tellen hire gladnesse,
Tr 3 1197 As wel as I have told hire hevynesse.
Tr 3 1198 Criseyde, which that felte hire thus itake,
Tr 3 1199 As writen clerkes in hire bokes olde,
Tr 3 1200 Right as an aspes leef she gan to quake,
Tr 3 1201 Whan she hym felte hire in his armes folde.
Tr 3 1202 But Troilus, al hool of cares colde,
Tr 3 1203 Gan thanken tho the bryghte goddes sevene;
Tr 3 1204 Thus sondry peynes bryngen folk in hevene.
Tr 3 1205 This Troilus in armes gan hire streyne,
Tr 3 1206 And seyde, “O swete, as evere mot I gon,
Tr 3 1207 Now be ye kaught; now is ther but we tweyne!
Tr 3 1208 Now yeldeth yow, for other bote is non!”
Tr 3 1209 To that Criseyde answerde thus anon,
Tr 3 1210 “Ne hadde I er now, my swete herte deere,
Tr 3 1211 Ben yolde, ywis, I were now nought heere!”
Tr 3 1212 O, sooth is seyd, that heled for to be
Tr 3 1213 As of a fevre or other gret siknesse,
Tr 3 1214 Men moste drynke, as men may ofte se,
Tr 3 1215 Ful bittre drynke; and for to han gladnesse
Tr 3 1216 Men drynken ofte peyne and gret distresse —
Tr 3 1217 I mene it here, as for this aventure,
Tr 3 1218 That thorugh a peyne hath founden al his cure.
Tr 3 1219 And now swetnesse semeth more swete,
Tr 3 1220 That bitternesse assaied was byforn;
Tr 3 1221 For out of wo in blisse now they flete;
Tr 3 1222 Non swich they felten sithen they were born.
Tr 3 1223 Now is this bet than bothe two be lorn.
Tr 3 1224 For love of God, take every womman heede
Tr 3 1225 To werken thus, if it comth to the neede.
Tr 3 1226 Criseyde, al quyt from every drede and tene,
Tr 3 1227 As she that juste cause hadde hym to triste,
Tr 3 1228 Made hym swych feste it joye was to sene,
Tr 3 1229 Whan she his trouthe and clene entente wiste;
Tr 3 1230 And as aboute a tree, with many a twiste,
Tr 3 1231 Bytrent and writh the swote wodebynde,
Tr 3 1232 Gan ech of hem in armes other wynde.
Tr 3 1233 And as the newe abaysed nyghtyngale,
Tr 3 1234 That stynteth first whan she bygynneth to synge,
Tr 3 1235 Whan that she hereth any herde tale,
Tr 3 1236 Or in the hegges any wyght stirynge,
Tr 3 1237 And after siker doth hire vois out rynge,
Tr 3 1238 Right so Criseyde, whan hire drede stente,
Tr 3 1239 Opned hire herte and tolde hym hire entente.
Tr 3 1240 And right as he that seth his deth yshapen,
Tr 3 1241 And dyen mot, in ought that he may gesse,
Tr 3 1242 And sodeynly rescous doth hym escapen,
Tr 3 1243 And from his deth is brought in sykernesse,
Tr 3 1244 For al this world, in swych present gladnesse
Tr 3 1245 Was Troilus, and hath his lady swete.
Tr 3 1246 With worse hap God lat us nevere mete!
Tr 3 1247 Hire armes smale, hire streghte bak and softe,
Tr 3 1248 Hire sydes longe, flesshly, smothe, and white
Tr 3 1249 He gan to stroke, and good thrift bad ful ofte
Tr 3 1250 Hire snowissh throte, hire brestes rounde and lite.
Tr 3 1251 Thus in this hevene he gan hym to delite,
Tr 3 1252 And therwithal a thousand tyme hire kiste,
Tr 3 1253 That what to don, for joie unnethe he wiste.
Tr 3 1254 Than seyde he thus: “O Love, O Charite!
Tr 3 1255 Thi moder ek, Citheria the swete,
Tr 3 1256 After thiself next heried be she —
Tr 3 1257 Venus mene I, the wel-willy planete! —
Tr 3 1258 And next that, Imeneus, I the grete,
Tr 3 1259 For nevere man was to yow goddes holde
Tr 3 1260 As I, which ye han brought fro cares colde.
Tr 3 1261 “Benigne Love, thow holy bond of thynges,
Tr 3 1262 Whoso wol grace and list the nought honouren,
Tr 3 1263 Lo, his desir wol fle withouten wynges;
Tr 3 1264 For noldestow of bownte hem socouren
Tr 3 1265 That serven best and most alwey labouren,
Tr 3 1266 Yet were al lost, that dar I wel seyn, certes,
Tr 3 1267 But if thi grace passed oure desertes.
Tr 3 1268 “And for thow me, that koude leest disserve
Tr 3 1269 Of hem that noumbred ben unto thi grace,
Tr 3 1270 Hast holpen, ther I likly was to sterve,
Tr 3 1271 And me bistowed in so heigh a place
Tr 3 1272 That thilke boundes may no blisse pace,
Tr 3 1273 I kan namore; but laude and reverence
Tr 3 1274 Be to thy bounte and thyn excellence!”
Tr 3 1275 And therwithal Criseyde anon he kiste,
Tr 3 1276 Of which certein she felte no disese,
Tr 3 1277 And thus seyde he: “Now wolde God I wiste,
Tr 3 1278 Myn herte swete, how I yow myght plese!
Tr 3 1279 What man,” quod he, “was evere thus at ese
Tr 3 1280 As I, on which the faireste and the beste
Tr 3 1281 That evere I say deyneth hire herte reste?
Tr 3 1282 “Here may men seen that mercy passeth right;
Tr 3 1283 Th’ experience of that is felt in me,
Tr 3 1284 That am unworthi to so swete a wight.
Tr 3 1285 But herte myn, of youre benignite,
Tr 3 1286 So thynketh, though that I unworthi be,
Tr 3 1287 Yet mot I nede amenden in som wyse,
Tr 3 1288 Right thorugh the vertu of youre heigh servyse.
Tr 3 1289 “And for the love of God, my lady deere,
Tr 3 1290 Syn God hath wrought me for I shall yow serve —
Tr 3 1291 As thus I mene: he wol ye be my steere,
Tr 3 1292 To do me lyve, if that yow liste, or sterve —
Tr 3 1293 So techeth me how that I may disserve
Tr 3 1294 Youre thonk, so that I thorugh myn ignoraunce
Tr 3 1295 Ne do no thyng that yow be displesaunce.
Tr 3 1296 “For certes, fresshe wommanliche wif,
Tr 3 1297 This dar I seye, that trouth and diligence,
Tr 3 1298 That shal ye fynden in me al my lif;
Tr 3 1299 N’ y wol nat, certein, breken youre defence;
Tr 3 1300 And if I do, present or in absence,
Tr 3 1301 For love of God, lat sle me with the dede,
Tr 3 1302 If that it like unto youre wommanhede.”
Tr 3 1303 “Iwys,” quod she, “myn owen hertes list,
Tr 3 1304 My ground of ese, and al myn herte deere,
Tr 3 1305 Gramercy, for on that is al my trist!
Tr 3 1306 But lat us falle awey fro this matere,
Tr 3 1307 For it suffiseth, this that seyd is heere,
Tr 3 1308 And at o word, withouten repentaunce,
Tr 3 1309 Welcome, my knyght, my pees, my suffisaunce!”
Tr 3 1310 Of hire delit or joies oon the leeste
Tr 3 1311 Were impossible to my wit to seye;
Tr 3 1312 But juggeth ye that han ben at the feste
Tr 3 1313 Of swich gladnesse, if that hem liste pleye!
Tr 3 1314 I kan namore, but thus thise ilke tweye
Tr 3 1315 That nyght, bitwixen drede and sikernesse,
Tr 3 1316 Felten in love the grete worthynesse.
Tr 3 1317 O blisful nyght, of hem so longe isought,
Tr 3 1318 How blithe unto hem bothe two thow weere!
Tr 3 1319 Why nad I swich oon with my soule ybought,
Tr 3 1320 Ye, or the leeste joie that was theere?
Tr 3 1321 Awey, thow foule daunger and thow feere,
Tr 3 1322 And lat hem in this hevene blisse dwelle,
Tr 3 1323 That is so heigh that al ne kan I telle!
Tr 3 1324 But sooth is, though I kan nat tellen al,
Tr 3 1325 As kan myn auctour, of his excellence,
Tr 3 1326 Yet have I seyd, and God toforn, and shal
Tr 3 1327 In every thyng, al holly his sentence;
Tr 3 1328 And if that ich, at Loves reverence,
Tr 3 1329 Have any word in eched for the beste,
Tr 3 1330 Doth therwithal right as youreselven leste.
Tr 3 1331 For myne wordes, heere and every part,
Tr 3 1332 I speke hem alle under correccioun
Tr 3 1333 Of yow that felyng han in loves art,
Tr 3 1334 And putte it al in youre discrecioun
Tr 3 1335 To encresse or maken dymynucioun
Tr 3 1336 Of my langage, and that I yow biseche.
Tr 3 1337 But now to purpos of my rather speche.
Tr 3 1338 Thise ilke two, that ben in armes laft,
Tr 3 1339 So loth to hem asonder gon it were,
Tr 3 1340 That ech from other wenden ben biraft,
Tr 3 1341 Or elles — lo, this was hir mooste feere —
Tr 3 1342 That al this thyng but nyce dremes were;
Tr 3 1343 For which ful ofte ech of hem seyde, “O swete,
Tr 3 1344 Clippe ich yow thus, or elles I it meete?”
Tr 3 1345 And Lord! So he gan goodly on hire se
Tr 3 1346 That nevere his look ne bleynte from hire face,
Tr 3 1347 And seyde, “O deere herte, may it be
Tr 3 1348 That it be soth, that ye ben in this place?”
Tr 3 1349 “Yee, herte myn, God thank I of his grace,”
Tr 3 1350 Quod tho Criseyde, and therwithal hym kiste,
Tr 3 1351 That where his spirit was, for joie he nyste.
Tr 3 1352 This Troilus ful ofte hire eyen two
Tr 3 1353 Gan for to kisse, and seyde, “O eyen clere,
Tr 3 1354 It weren ye that wroughte me swich wo,
Tr 3 1355 Ye humble nettes of my lady deere!
Tr 3 1356 Though ther be mercy writen in youre cheere,
Tr 3 1357 God woot, the text ful hard is, soth, to fynde!
Tr 3 1358 How koude ye withouten bond me bynde?”
Tr 3 1359 Therwith he gan hire faste in armes take,
Tr 3 1360 And wel a thousand tymes gan he syke —
Tr 3 1361 Naught swiche sorwfull sikes as men make
Tr 3 1362 For wo, or elles when that folk ben sike,
Tr 3 1363 But esy sykes, swiche as ben to like,
Tr 3 1364 That shewed his affeccioun withinne;
Tr 3 1365 Of swiche sikes koude he nought bilynne.
Tr 3 1366 Soone after this they spake of sondry thynges,
Tr 3 1367 As fel to purpos of this aventure,
Tr 3 1368 And pleyinge entrechaungeden hire rynges,
Tr 3 1369 Of whiche I kan nought tellen no scripture;
Tr 3 1370 But wel I woot, a broche, gold and asure,
Tr 3 1371 In which a ruby set was lik an herte,
Tr 3 1372 Criseyde hym yaf, and stak it on his sherte.
Tr 3 1373 Lord, trowe ye a coveytous or a wrecche,
Tr 3 1374 That blameth love and halt of it despit,
Tr 3 1375 That of tho pens that he kan mokre and kecche
Tr 3 1376 Was evere yit yyeven hym swich delit
Tr 3 1377 As is in love, in o poynt, in som plit?
Tr 3 1378 Nay, douteles, for also God me save,
Tr 3 1379 So perfit joie may no nygard have.
Tr 3 1380 They wol seyn “Yis,” but Lord, so they lye,
Tr 3 1381 Tho besy wrecches, ful of wo and drede!
Tr 3 1382 Thei callen love a woodnesse or folie,
Tr 3 1383 But it shall falle hem as I shal yow rede:
Tr 3 1384 They shal forgon the white and ek the rede,
Tr 3 1385 And lyve in wo, ther God yeve hem meschaunce,
Tr 3 1386 And every lovere in his trouthe avaunce!
Tr 3 1387 As wolde God tho wrecches that dispise
Tr 3 1388 Servise of love hadde erys also longe
Tr 3 1389 As hadde Mida, ful of coveytise,
Tr 3 1390 And therto dronken hadde as hoot and stronge
Tr 3 1391 As Crassus did for his affectis wronge,
Tr 3 1392 To techen hem that they ben in the vice,
Tr 3 1393 And loveres nought, although they holde hem nyce.
Tr 3 1394 Thise ilke two of whom that I yow seye,
Tr 3 1395 Whan that hire hertes wel assured were,
Tr 3 1396 Tho gonne they to speken and to pleye,
Tr 3 1397 And ek rehercen how, and whan, and where
Tr 3 1398 Thei knewe hem first, and every wo and feere
Tr 3 1399 That passed was; but al swich hevynesse —
Tr 3 1400 I thank it God — was torned to gladnesse.
Tr 3 1401 And evere mo, when that hem fel to speke
Tr 3 1402 Of any wo of swich a tyme agoon,
Tr 3 1403 With kissyng al that tale sholde breke
Tr 3 1404 And fallen in a newe joye anoon;
Tr 3 1405 And diden al hire myght, syn they were oon,
Tr 3 1406 For to recoveren blisse and ben at eise,
Tr 3 1407 And passed wo with joie contrepeise.
Tr 3 1408 Resoun wol nought that I speke of slep,
Tr 3 1409 For it acordeth nought to my matere.
Tr 3 1410 God woot, they took of that ful litel kep!
Tr 3 1411 But lest this nyght, that was to hem so deere,
Tr 3 1412 Ne sholde in veyn escape in no manere,
Tr 3 1413 It was byset in joie and bisynesse
Tr 3 1414 Of al that souneth into gentilesse.
Tr 3 1415 But whan the cok, comune astrologer,
Tr 3 1416 Gan on his brest to bete and after crowe,
Tr 3 1417 And Lucyfer, the dayes messager,
Tr 3 1418 Gan for to rise and out hire bemes throwe,
Tr 3 1419 And estward roos — to hym that koude it knowe —
Tr 3 1420 Fortuna Major, that anoon Criseyde,
Tr 3 1421 With herte soor, to Troilus thus seyde:
Tr 3 1422 “Myn hertes lif, my trist, al my plesaunce,
Tr 3 1423 That I was born, allas, what me is wo,
Tr 3 1424 That day of us moot make disseveraunce!
Tr 3 1425 For tyme it is to ryse and hennes go,
Tr 3 1426 Or ellis I am lost for evere mo!
Tr 3 1427 O nyght, allas, why nyltow over us hove
Tr 3 1428 As longe as whan Almena lay by Jove?
Tr 3 1429 “O blake nyght, as folk in bokes rede,
Tr 3 1430 That shapen art by God this world to hide
Tr 3 1431 At certeyn tymes wyth thi derke wede,
Tr 3 1432 That under that men myghte in reste abide,
Tr 3 1433 Wel oughten bestes pleyne and folk the chide,
Tr 3 1434 That there as day wyth labour wolde us breste,
Tr 3 1435 That thow thus fleest, and deynest us nought reste.
Tr 3 1436 “Thow doost, allas, to shortly thyn office,
Tr 3 1437 Thow rakle nyght! Ther God, maker of kynde,
Tr 3 1438 The, for thyn haste and thyn unkynde vice,
Tr 3 1439 So faste ay to oure hemysperie bynde
Tr 3 1440 That nevere more under the ground thow wynde!
Tr 3 1441 For now, for thow so hiest out of Troie,
Tr 3 1442 Have I forgon thus hastili my joie!”
Tr 3 1443 This Troilus, that with tho wordes felte,
Tr 3 1444 As thoughte hym tho, for pietous distresse
Tr 3 1445 The blody teris from his herte melte,
Tr 3 1446 As he that nevere yet swich hevynesse
Tr 3 1447 Assayed hadde, out of so gret gladnesse,
Tr 3 1448 Gan therwithal Criseyde, his lady deere,
Tr 3 1449 In armes streyne, and seyde in this manere:
Tr 3 1450 “O cruel day, accusour of the joie
Tr 3 1451 That nyght and love han stole and faste iwryen,
Tr 3 1452 Acorsed be thi comyng into Troye,
Tr 3 1453 For every bore hath oon of thi bryghte yen!
Tr 3 1454 Envyous day, what list the so to spien?
Tr 3 1455 What hastow lost? Why sekestow this place?
Tr 3 1456 Ther God thi light so quenche, for his grace!
Tr 3 1457 “Allas, what have thise loveris the agylt,
Tr 3 1458 Dispitous day? Thyn be the peyne of helle!
Tr 3 1459 For many a lovere hastow slayn, and wilt;
Tr 3 1460 Thy pourynge in wol nowher lat hem dwelle.
Tr 3 1461 What profrestow thi light here for to selle?
Tr 3 1462 Go selle it hem that smale selys grave;
Tr 3 1463 We wol the nought; us nedeth no day have.”
Tr 3 1464 And ek the sonne, Titan, gan he chide,
Tr 3 1465 And seyde, “O fool, wel may men the dispise,
Tr 3 1466 That hast the dawyng al nyght by thi syde,
Tr 3 1467 And suffrest hire so soone up fro the rise
Tr 3 1468 For to disese loveris in this wyse.
Tr 3 1469 What, holde youre bed ther, thow, and ek thi Morwe!
Tr 3 1470 I bidde God, so yeve yow bothe sorwe!”
Tr 3 1471 Therwith ful soore he syghte, and thus he seyde:
Tr 3 1472 “My lady right, and of my wele or wo
Tr 3 1473 The welle and roote, O goodly myn Criseyde,
Tr 3 1474 And shal I rise, allas, and shal I so?
Tr 3 1475 Now fele I that myn herte moot a-two,
Tr 3 1476 For how sholde I my lif an houre save,
Tr 3 1477 Syn that with yow is al the lif ich have?
Tr 3 1478 “What shal I don? For, certes, I not how,
Tr 3 1479 Ne whan, allas, I shal the tyme see
Tr 3 1480 That in this plit I may ben eft with yow;
Tr 3 1481 And of my lif, God woot how that shal be,
Tr 3 1482 Syn that desir right now so streyneth me
Tr 3 1483 That I am ded anon, but I retourne.
Tr 3 1484 How sholde I longe, allas, fro yow sojourne?
Tr 3 1485 “But natheles, myn owen lady bright,
Tr 3 1486 Were it so that I wiste outrely
Tr 3 1487 That I, youre humble servant and youre knyght,
Tr 3 1488 Were in youre herte iset so fermely
Tr 3 1489 As ye in myn — the which thyng, trewely,
Tr 3 1490 Me levere were than thise worldes tweyne —
Tr 3 1491 Yet sholde I bet enduren al my peyne.”
Tr 3 1492 To that Criseyde answerde right anon,
Tr 3 1493 And with a sik she seyde, “O herte deere,
Tr 3 1494 The game, ywys, so ferforth now is gon
Tr 3 1495 That first shal Phebus fallen fro his speere,
Tr 3 1496 And everich egle ben the dowves feere,
Tr 3 1497 And everich roche out of his place sterte,
Tr 3 1498 Er Troilus oute of Criseydes herte.
Tr 3 1499 “Ye ben so depe in-with myn herte grave,
Tr 3 1500 That, though I wolde it torne out of my thought,
Tr 3 1501 As wisly verray God my soule save,
Tr 3 1502 To dyen in the peyne, I koude nought.
Tr 3 1503 And, for the love of God that us hath wrought,
Tr 3 1504 Lat in youre brayn non other fantasie
Tr 3 1505 So crepe that it cause me to dye!
Tr 3 1506 “And that ye me wolde han as faste in mynde
Tr 3 1507 As I have yow, that wolde I yow biseche;
Tr 3 1508 And if I wiste sothly that to fynde,
Tr 3 1509 God myghte nought a poynt my joies eche.
Tr 3 1510 But herte myn, withouten more speche,
Tr 3 1511 Beth to me trewe, or ellis were it routhe,
Tr 3 1512 For I am thyn, by God and by my trouthe!
Tr 3 1513 “Beth glad, forthy, and lyve in sikernesse!
Tr 3 1514 Thus seyde I nevere er this, ne shal to mo;
Tr 3 1515 And if to yow it were a gret gladnesse
Tr 3 1516 To torne ayeyn soone after that ye go,
Tr 3 1517 As fayn wolde I as ye that it were so,
Tr 3 1518 As wisly God myn herte brynge at reste!”
Tr 3 1519 And hym in armes tok, and ofte keste.
Tr 3 1520 Agayns his wil, sith it mot nedes be,
Tr 3 1521 This Troilus up ros, and faste hym cledde,
Tr 3 1522 And in his armes took his lady free
Tr 3 1523 An hondred tyme, and on his wey hym spedde;
Tr 3 1524 And with swich voys as though his herte bledde,
Tr 3 1525 He seyde, “Farwel, dere herte swete;
Tr 3 1526 Ther God us graunte sownde and soone to mete!”
Tr 3 1527 To which no word for sorwe she answerde,
Tr 3 1528 So soore gan his partyng hire distreyne;
Tr 3 1529 And Troilus unto his paleys ferde,
Tr 3 1530 As wo-bygon as she was, soth to seyne.
Tr 3 1531 So harde hym wrong of sharp desir the peyne
Tr 3 1532 For to ben eft there he was in plesaunce,
Tr 3 1533 That it may nevere out of his remembraunce.
Tr 3 1534 Retorned to his real paleys soone,
Tr 3 1535 He softe into his bed gan for to slynke,
Tr 3 1536 To slepe longe, as he was wont to doone.
Tr 3 1537 But al for nought; he may wel ligge and wynke,
Tr 3 1538 But slep ne may ther in his herte synke,
Tr 3 1539 Thynkyng how she for whom desir hym brende
Tr 3 1540 A thousand fold was worth more than he wende.
Tr 3 1541 And in his thought gan up and down to wynde
Tr 3 1542 Hire wordes alle, and every countenaunce,
Tr 3 1543 And fermely impressen in his mynde
Tr 3 1544 The leeste point that to him was plesaunce;
Tr 3 1545 And verraylich of thilke remembraunce
Tr 3 1546 Desir al newe hym brende, and lust to brede
Tr 3 1547 Gan more than erst, and yet took he non hede.
Tr 3 1548 Criseyde also, right in the same wyse,
Tr 3 1549 Of Troilus gan in hire herte shette
Tr 3 1550 His worthynesse, his lust, his dedes wise,
Tr 3 1551 His gentilesse, and how she with hym mette,
Tr 3 1552 Thonkyng Love he so wel hire bisette,
Tr 3 1553 Desiryng eft to han hire herte deere
Tr 3 1554 In swich a plit, she dorste make hym cheere.
Tr 3 1555 Pandare, o-morwe, which that comen was
Tr 3 1556 Unto his nece and gan hire faire grete,
Tr 3 1557 Seyde, “Al this nyght so reyned it, allas,
Tr 3 1558 That al my drede is that ye, nece swete,
Tr 3 1559 Han litel laiser had to slepe and mete.
Tr 3 1560 Al nyght,” quod he, “hath reyn so do me wake,
Tr 3 1561 That som of us, I trowe, hire hedes ake.”
Tr 3 1562 And ner he com, and seyde, “How stant it now
Tr 3 1563 This mury morwe? Nece, how kan ye fare?”
Tr 3 1564 Criseyde answerde, “Nevere the bet for yow,
Tr 3 1565 Fox that ye ben! God yeve youre herte kare!
Tr 3 1566 God help me so, ye caused al this fare,
Tr 3 1567 Trowe I,” quod she, “for al youre wordes white.
Tr 3 1568 O, whoso seeth yow knoweth yow ful lite.”
Tr 3 1569 With that she gan hire face for to wrye
Tr 3 1570 With the shete, and wax for shame al reed;
Tr 3 1571 And Pandarus gan under for to prie,
Tr 3 1572 And seyde, “Nece, if that I shal be ded,
Tr 3 1573 Have here a swerd and smyteth of myn hed!”
Tr 3 1574 With that his arm al sodeynly he thriste
Tr 3 1575 Under hire nekke, and at the laste hire kyste.
Tr 3 1576 I passe al that which chargeth nought to seye.
Tr 3 1577 What! God foryaf his deth, and she al so
Tr 3 1578 Foryaf, and with here uncle gan to pleye,
Tr 3 1579 For other cause was ther noon than so.
Tr 3 1580 But of this thing right to the effect to go:
Tr 3 1581 Whan tyme was, hom til here hous she wente,
Tr 3 1582 And Pandarus hath fully his entente.
Tr 3 1583 Now torne we ayeyn to Troilus,
Tr 3 1584 That resteles ful longe abedde lay,
Tr 3 1585 And pryvely sente after Pandarus,
Tr 3 1586 To hym to com in al the haste he may.
Tr 3 1587 He com anon — nought ones seyde he nay —
Tr 3 1588 And Troilus ful sobrely he grette,
Tr 3 1589 And down upon his beddes syde hym sette.
Tr 3 1590 This Troilus, with al th’ affeccioun
Tr 3 1591 Of frendes love that herte may devyse,
Tr 3 1592 To Pandarus on knowes fil adown,
Tr 3 1593 And er that he wolde of the place arise
Tr 3 1594 He gan hym thonken in his beste wise
Tr 3 1595 An hondred sythe, and gan the tyme blesse
Tr 3 1596 That he was born, to brynge hym fro destresse.
Tr 3 1597 He seyde, “O frend of frendes the alderbeste
Tr 3 1598 That evere was, the sothe for to telle,
Tr 3 1599 Thow hast in hevene ybrought my soule at reste
Tr 3 1600 Fro Flegitoun, the fery flood of helle,
Tr 3 1601 That, though I myght a thousand tymes selle
Tr 3 1602 Upon a day my lif in thi servise,
Tr 3 1603 It myghte naught a moote in that suffise.
Tr 3 1604 “The sonne, which that al the world may se,
Tr 3 1605 Saugh nevere yet my lif, that dar I leye,
Tr 3 1606 So inly fair and goodly as is she
Tr 3 1607 Whos I am al, and shal, tyl that I deye.
Tr 3 1608 And that I thus am hires, dar I seye,
Tr 3 1609 That thanked be the heighe worthynesse
Tr 3 1610 Of Love, and ek thi kynde bysynesse.
Tr 3 1611 “Thus hastow me no litel thing yyive,
Tr 3 1612 For which to the obliged be for ay
Tr 3 1613 My lif. And whi? For thorugh thyn help I lyve,
Tr 3 1614 Or elles ded hadde I ben many a day.”
Tr 3 1615 And with that word down in his bed he lay,
Tr 3 1616 And Pandarus ful sobrely hym herde
Tr 3 1617 Tyl al was seyd, and than he thus answerde:
Tr 3 1618 “My deere frend, if I have don for the
Tr 3 1619 In any cas, God wot, it is me lief,
Tr 3 1620 And am as glad as man may of it be,
Tr 3 1621 God help me so; but tak now nat a-grief
Tr 3 1622 That I shal seyn: be war of this meschief,
Tr 3 1623 That, there as thow now brought art in thy blisse,
Tr 3 1624 That thow thiself ne cause it nat to misse.
Tr 3 1625 “For of fortunes sharpe adversitee
Tr 3 1626 The worste kynde of infortune is this,
Tr 3 1627 A man to han ben in prosperitee,
Tr 3 1628 And it remembren whan it passed is.
Tr 3 1629 Th’ art wis ynough; forthi do nat amys:
Tr 3 1630 Be naught to rakel, theigh thow sitte warme,
Tr 3 1631 For if thow be, certeyn it wol the harme.
Tr 3 1632 “Thow art at ese, and hold the wel therinne;
Tr 3 1633 For also seur as reed is every fir,
Tr 3 1634 As gret a craft is kepe wel as wynne.
Tr 3 1635 Bridle alwey wel thi speche and thi desir,
Tr 3 1636 For worldly joie halt nought but by a wir.
Tr 3 1637 That preveth wel, it brest al day so ofte;
Tr 3 1638 Forthi nede is to werken with it softe.”
Tr 3 1639 Quod Troilus, “I hope, and God toforn,
Tr 3 1640 My deere frend, that I shal so me beere
Tr 3 1641 That in my gylt ther shal nothyng be lorn,
Tr 3 1642 N’ y nyl nought rakle as for to greven heere.
Tr 3 1643 It nedeth naught this matere ofte stere;
Tr 3 1644 For wystestow myn herte wel, Pandare,
Tr 3 1645 God woot, of this thow woldest litel care.”
Tr 3 1646 Tho gan he telle hym of his glade nyght,
Tr 3 1647 And wherof first his herte dred, and how,
Tr 3 1648 And seyde, “Frend, as I am trewe knyght,
Tr 3 1649 And by that feyth I shal to God and yow,
Tr 3 1650 I hadde it nevere half so hote as now;
Tr 3 1651 And ay the more that desir me biteth
Tr 3 1652 To love hire best, the more it me deliteth.
Tr 3 1653 “I not myself naught wisly what it is,
Tr 3 1654 But now I feele a newe qualitee —
Tr 3 1655 Yee, al another than I dide er this.”
Tr 3 1656 Pandare answerd, and seyde thus, that “he
Tr 3 1657 That ones may in hevene blisse be,
Tr 3 1658 He feleth other weyes, dar I leye,
Tr 3 1659 Than thilke tyme he first herde of it seye.”
Tr 3 1660 This is o word for al: this Troilus
Tr 3 1661 Was nevere ful to speke of this matere,
Tr 3 1662 And for to preisen unto Pandarus
Tr 3 1663 The bounte of his righte lady deere,
Tr 3 1664 And Pandarus to thanke and maken cheere.
Tr 3 1665 This tale ay was span-newe to bygynne,
Tr 3 1666 Til that the nyght departed hem atwynne.
Tr 3 1667 Soon after this, for that Fortune it wolde,
Tr 3 1668 Icomen was the blisful tyme swete
Tr 3 1669 That Troilus was warned that he sholde,
Tr 3 1670 There he was erst, Criseyde his lady mete,
Tr 3 1671 For which he felte his herte in joie flete
Tr 3 1672 And feithfully gan alle the goddes herie.
Tr 3 1673 And lat se now if that he kan be merie!
Tr 3 1674 And holden was the forme and al the wise
Tr 3 1675 Of hire commyng, and of his also,
Tr 3 1676 As it was erst, which nedeth nought devyse.
Tr 3 1677 But pleynly to th’ effect right for to go:
Tr 3 1678 In joie and suerte Pandarus hem two
Tr 3 1679 Abedde brought, whan that hem bothe leste,
Tr 3 1680 And thus they ben in quyete and in reste.
Tr 3 1681 Nought nedeth it to yow, syn they ben met,
Tr 3 1682 To axe at me if that they blithe were;
Tr 3 1683 For if it erst was wel, tho was it bet
Tr 3 1684 A thousand fold; this nedeth nought enquere.
Tr 3 1685 Ago was every sorwe and every feere;
Tr 3 1686 And bothe, ywys, they hadde, and so they wende,
Tr 3 1687 As muche joie as herte may comprende.
Tr 3 1688 This is no litel thyng of for to seye;
Tr 3 1689 This passeth every wit for to devyse;
Tr 3 1690 For ech of hem gan otheres lust obeye.
Tr 3 1691 Felicite, which that thise clerkes wise
Tr 3 1692 Comenden so, ne may nought here suffise;
Tr 3 1693 This joie may nought writen be with inke;
Tr 3 1694 This passeth al that herte may bythynke.
Tr 3 1695 But cruel day — so wailaway the stounde! —
Tr 3 1696 Gan for t’ aproche, as they by sygnes knewe,
Tr 3 1697 For which hem thoughte feelen dethis wownde.
Tr 3 1698 So wo was hem that chaungen gan hire hewe,
Tr 3 1699 And day they gonnen to despise al newe,
Tr 3 1700 Callyng it traitour, envyous, and worse,
Tr 3 1701 And bitterly the dayes light thei corse.
Tr 3 1702 Quod Troilus, “Allas, now am I war
Tr 3 1703 That Piros and tho swifte steedes thre,
Tr 3 1704 Which that drawen forth the sonnes char,
Tr 3 1705 Han gon som bi-path in dispit of me;
Tr 3 1706 That maketh it so soone day to be;
Tr 3 1707 And for the sonne hym hasteth thus to rise,
Tr 3 1708 Ne shal I nevere don hire sacrifise.”
Tr 3 1709 But nedes day departe hem moste soone,
Tr 3 1710 And whan hire speche don was and hire cheere,
Tr 3 1711 They twynne anon, as they were wont to doone,
Tr 3 1712 And setten tyme of metyng eft yfeere;
Tr 3 1713 And many a nyght they wroughte in this manere,
Tr 3 1714 And thus Fortune a tyme ledde in joie
Tr 3 1715 Criseyde and ek this kynges sone of Troie.
Tr 3 1716 In suffisaunce, in blisse, and in singynges,
Tr 3 1717 This Troilus gan al his lif to lede.
Tr 3 1718 He spendeth, jousteth, maketh festeynges;
Tr 3 1719 He yeveth frely ofte, and chaungeth wede,
Tr 3 1720 And held aboute hym alwey, out of drede,
Tr 3 1721 A world of folk, as com hym wel of kynde,
Tr 3 1722 The fresshest and the beste he koude fynde;
Tr 3 1723 That swich a vois was of hym and a stevene,
Tr 3 1724 Thorughout the world, of honour and largesse,
Tr 3 1725 That it up rong unto the yate of hevene;
Tr 3 1726 And, as in love, he was in swich gladnesse
Tr 3 1727 That in his herte he demed, as I gesse,
Tr 3 1728 That ther nys lovere in this world at ese
Tr 3 1729 So wel as he; and thus gan love hym plese.
Tr 3 1730 The goodlihede or beaute which that kynde
Tr 3 1731 In any other lady hadde yset
Tr 3 1732 Kan nought the montance of a knotte unbynde
Tr 3 1733 Aboute his herte of al Criseydes net.
Tr 3 1734 He was so narwe ymasked and yknet,
Tr 3 1735 That it undon on any manere syde,
Tr 3 1736 That nyl naught ben, for aught that may bitide.
Tr 3 1737 And by the hond ful ofte he wolde take
Tr 3 1738 This Pandarus, and into gardyn lede,
Tr 3 1739 And swich a feste and swich a proces make
Tr 3 1740 Hym of Criseyde, and of hire wommanhede,
Tr 3 1741 And of hire beaute, that withouten drede
Tr 3 1742 It was an hevene his wordes for to here;
Tr 3 1743 And thanne he wolde synge in this manere:
Tr 3 1744 “Love, that of erthe and se hath governaunce,
Tr 3 1745 Love, that his hestes hath in hevene hye,
Tr 3 1746 Love, that with an holsom alliaunce
Tr 3 1747 Halt peples joyned, as hym lest hem gye,
Tr 3 1748 Love, that knetteth lawe of compaignie,
Tr 3 1749 And couples doth in vertu for to dwelle,
Tr 3 1750 Bynd this acord, that I have told and telle.
Tr 3 1751 “That, that the world with feith which that is stable
Tr 3 1752 Diverseth so his stowndes concordynge,
Tr 3 1753 That elementz that ben so discordable
Tr 3 1754 Holden a bond perpetuely durynge,
Tr 3 1755 That Phebus mote his rosy day forth brynge,
Tr 3 1756 And that the mone hath lordshipe over the nyghtes:
Tr 3 1757 Al this doth Love, ay heried be his myghtes! —
Tr 3 1758 “That, that the se, that gredy is to flowen,
Tr 3 1759 Constreyneth to a certeyn ende so
Tr 3 1760 His flodes that so fiersly they ne growen
Tr 3 1761 To drenchen erthe and al for evere mo;
Tr 3 1762 And if that Love aught lete his bridel go,
Tr 3 1763 Al that now loveth asondre sholde lepe,
Tr 3 1764 And lost were al that Love halt now to-hepe.
Tr 3 1765 “So wolde God, that auctour is of kynde,
Tr 3 1766 That with his bond Love of his vertu liste
Tr 3 1767 To cerclen hertes alle and faste bynde,
Tr 3 1768 That from his bond no wight the wey out wiste;
Tr 3 1769 And hertes colde, hem wolde I that he twiste
Tr 3 1770 To make hem love, and that hem liste ay rewe
Tr 3 1771 On hertes sore, and kepe hem that ben trewe!”
Tr 3 1772 In alle nedes for the townes werre
Tr 3 1773 He was, and ay, the first in armes dyght,
Tr 3 1774 And certeynly, but if that bokes erre,
Tr 3 1775 Save Ector most ydred of any wight;
Tr 3 1776 And this encrees of hardynesse and myght
Tr 3 1777 Com hym of love, his ladies thank to wynne,
Tr 3 1778 That altered his spirit so withinne.
Tr 3 1779 In tyme of trewe, on haukyng wolde he ride,
Tr 3 1780 Or elles honte boor, beer, or lyoun;
Tr 3 1781 The smale bestes leet he gon biside.
Tr 3 1782 And whan that he com ridyng into town,
Tr 3 1783 Ful ofte his lady from hire wyndow down,
Tr 3 1784 As fressh as faukoun comen out of muwe,
Tr 3 1785 Ful redy was hym goodly to saluwe.
Tr 3 1786 And moost of love and vertu was his speche,
Tr 3 1787 And in despit hadde alle wrecchednesse;
Tr 3 1788 And douteles, no nede was hym biseche
Tr 3 1789 To honouren hem that hadde worthynesse,
Tr 3 1790 And esen hem that weren in destresse;
Tr 3 1791 And glad was he if any wyght wel ferde,
Tr 3 1792 That lovere was, whan he it wiste or herde.
Tr 3 1793 For soth to seyne, he lost held every wyght,
Tr 3 1794 But if he were in Loves heigh servise —
Tr 3 1795 I mene folk that oughte it ben of right.
Tr 3 1796 And over al this, so wel koude he devyse
Tr 3 1797 Of sentement and in so unkouth wise
Tr 3 1798 Al his array, that every lovere thoughte
Tr 3 1799 That al was wel, what so he seyde or wroughte.
Tr 3 1800 And though that he be come of blood roial,
Tr 3 1801 Hym liste of pride at no wight for to chace;
Tr 3 1802 Benigne he was to ech in general,
Tr 3 1803 For which he gat hym thank in every place.
Tr 3 1804 Thus wolde Love — yheried be his grace! —
Tr 3 1805 That Pride, Envye, Ire, and Avarice
Tr 3 1806 He gan to fle, and everich other vice.
Tr 3 1807 Thow lady bryght, the doughter to Dyone,
Tr 3 1808 Thy blynde and wynged sone ek, daun Cupide,
Tr 3 1809 Yee sustren nyne ek, that by Elicone
Tr 3 1810 In hil Pernaso listen for t’ abide,
Tr 3 1811 That ye thus fer han deyned me to gyde —
Tr 3 1812 I kan namore, but syn that ye wol wende,
Tr 3 1813 Ye heried ben for ay withouten ende!
Tr 3 1814 Thorugh yow have I seyd fully in my song
Tr 3 1815 Th’ effect and joie of Troilus servise,
Tr 3 1816 Al be that ther was som disese among,
Tr 3 1817 As to myn auctour listeth to devise.
Tr 3 1818 My thridde bok now ende ich in this wyse,
Tr 3 1819 And Troilus in lust and in quiete
Tr 3 1820 Is with Criseyde, his owen herte swete.