By Geoffrey Chaucer
Tr 1 1 The double sorwe of Troilus to tellen,
Tr 1 2 That was the kyng Priamus sone of Troye,
Tr 1 3 In lovynge, how his aventures fellen
Tr 1 4 Fro wo to wele, and after out of joie,
Tr 1 5 My purpos is, er that I parte fro ye.
Tr 1 6 Thesiphone, thow help me for t’ endite
Tr 1 7 Thise woful vers, that wepen as I write.
Tr 1 8 To the clepe I, thow goddesse of torment,
Tr 1 9 Thow cruwel Furie, sorwynge evere in peyne,
Tr 1 10 Help me, that am the sorwful instrument,
Tr 1 11 That helpeth loveres, as I kan, to pleyne;
Tr 1 12 For wel sit it, the sothe for to seyne,
Tr 1 13 A woful wight to han a drery feere,
Tr 1 14 And to a sorwful tale, a sory chere.
Tr 1 15 For I, that God of Loves servantz serve,
Tr 1 16 Ne dar to Love, for myn unliklynesse,
Tr 1 17 Preyen for speed, al sholde I therfore sterve,
Tr 1 18 So fer am I from his help in derknesse.
Tr 1 19 But natheles, if this may don gladnesse
Tr 1 20 Unto any lovere, and his cause availle,
Tr 1 21 Have he my thonk, and myn be this travaille!
Tr 1 22 But ye loveres, that bathen in gladnesse,
Tr 1 23 If any drope of pyte in yow be,
Tr 1 24 Remembreth yow on passed hevynesse
Tr 1 25 That ye han felt, and on the adversite
Tr 1 26 Of othere folk, and thynketh how that ye
Tr 1 27 Han felt that Love dorste yow displese,
Tr 1 28 Or ye han wonne hym with to gret an ese.
Tr 1 29 And preieth for hem that ben in the cas
Tr 1 30 Of Troilus, as ye may after here,
Tr 1 31 That Love hem brynge in hevene to solas;
Tr 1 32 And ek for me preieth to God so dere
Tr 1 33 That I have myght to shewe, in som manere,
Tr 1 34 Swich peyne and wo as Loves folk endure,
Tr 1 35 In Troilus unsely aventure.
Tr 1 36 And biddeth ek for hem that ben despeired
Tr 1 37 In love, that nevere nyl recovered be,
Tr 1 38 And ek for hem that falsly ben apeired
Tr 1 39 Thorugh wikked tonges, be it he or she;
Tr 1 40 Thus biddeth God, for his benignite,
Tr 1 41 So graunte hem soone owt of this world to pace,
Tr 1 42 That ben despeired out of Loves grace.
Tr 1 43 And biddeth ek for hem that ben at ese,
Tr 1 44 That God hem graunte ay good perseveraunce,
Tr 1 45 And sende hem myght hire ladies so to plese
Tr 1 46 That it to Love be worship and plesaunce.
Tr 1 47 For so hope I my sowle best avaunce,
Tr 1 48 To prey for hem that Loves servauntz be,
Tr 1 49 And write hire wo, and lyve in charite,
Tr 1 50 And for to have of hem compassioun,
Tr 1 51 As though I were hire owne brother dere.
Tr 1 52 Now herkneth with a good entencioun,
Tr 1 53 For now wil I gon streght to my matere,
Tr 1 54 In which ye may the double sorwes here
Tr 1 55 Of Troilus in lovynge of Criseyde,
Tr 1 56 And how that she forsook hym er she deyde.
Tr 1 57 Yt is wel wist how that the Grekes stronge
Tr 1 58 In armes with a thousand shippes wente
Tr 1 59 To Troiewardes, and the cite longe
Tr 1 60 Assegeden, neigh ten yer er they stente,
Tr 1 61 And in diverse wise and oon entente,
Tr 1 62 The ravysshyng to wreken of Eleyne,
Tr 1 63 By Paris don, they wroughten al hir peyne.
Tr 1 64 Now fel it so that in the town ther was
Tr 1 65 Dwellynge a lord of gret auctorite,
Tr 1 66 A gret devyn, that clepid was Calkas,
Tr 1 67 That in science so expert was that he
Tr 1 68 Knew wel that Troie sholde destroied be,
Tr 1 69 By answere of his god, that highte thus:
Tr 1 70 Daun Phebus or Appollo Delphicus.
Tr 1 71 So whan this Calkas knew by calkulynge,
Tr 1 72 And ek by answer of this Appollo,
Tr 1 73 That Grekes sholden swich a peple brynge,
Tr 1 74 Thorugh which that Troie moste ben fordo,
Tr 1 75 He caste anon out of the town to go;
Tr 1 76 For wel wiste he by sort that Troye sholde
Tr 1 77 Destroyed ben, ye, wolde whoso nolde.
Tr 1 78 For which for to departen softely
Tr 1 79 Took purpos ful this forknowynge wise,
Tr 1 80 And to the Grekes oost ful pryvely
Tr 1 81 He stal anon; and they, in curteys wise,
Tr 1 82 Hym diden bothe worship and servyce,
Tr 1 83 In trust that he hath konnynge hem to rede
Tr 1 84 In every peril which that is to drede.
Tr 1 85 Gret rumour gan, whan it was first aspied
Tr 1 86 Thorugh al the town, and generaly was spoken,
Tr 1 87 That Calkas traitour fled was and allied
Tr 1 88 With hem of Grece, and casten to be wroken
Tr 1 89 On hym that falsly hadde his feith so broken,
Tr 1 90 And seyden he and al his kyn at-ones
Tr 1 91 Ben worthi for to brennen, fel and bones.
Tr 1 92 Now hadde Calkas left in this meschaunce,
Tr 1 93 Al unwist of this false and wikked dede,
Tr 1 94 His doughter, which that was in gret penaunce,
Tr 1 95 For of hire lif she was ful sore in drede,
Tr 1 96 As she that nyste what was best to rede;
Tr 1 97 For bothe a widewe was she and allone
Tr 1 98 Of any frend to whom she dorste hir mone.
Tr 1 99 Criseyde was this lady name al right.
Tr 1 100 As to my doom, in al Troies cite
Tr 1 101 Nas non so fair, forpassynge every wight,
Tr 1 102 So aungelik was hir natif beaute,
Tr 1 103 That lik a thing inmortal semed she,
Tr 1 104 As doth an hevenyssh perfit creature,
Tr 1 105 That down were sent in scornynge of nature.
Tr 1 106 This lady, which that alday herd at ere
Tr 1 107 Hire fadres shame, his falsnesse and tresoun,
Tr 1 108 Wel neigh out of hir wit for sorwe and fere,
Tr 1 109 In widewes habit large of samyt broun,
Tr 1 110 On knees she fil biforn Ector adown
Tr 1 111 With pitous vois, and tendrely wepynge,
Tr 1 112 His mercy bad, hirselven excusynge.
Tr 1 113 Now was this Ector pitous of nature,
Tr 1 114 And saugh that she was sorwfully bigon,
Tr 1 115 And that she was so fair a creature;
Tr 1 116 Of his goodnesse he gladede hire anon,
Tr 1 117 And seyde, “Lat youre fadres treson gon
Tr 1 118 Forth with meschaunce, and ye youreself in joie
Tr 1 119 Dwelleth with us, whil yow good list, in Troie.
Tr 1 120 “And al th’ onour that men may don yow have,
Tr 1 121 As ferforth as youre fader dwelled here,
Tr 1 122 Ye shul have, and youre body shal men save,
Tr 1 123 As fer as I may ought enquere or here.”
Tr 1 124 And she hym thonked with ful humble chere,
Tr 1 125 And ofter wolde, and it hadde ben his wille,
Tr 1 126 And took hire leve, and hom, and held hir stille.
Tr 1 127 And in hire hous she abood with swich meyne
Tr 1 128 As til hire honour nede was to holde;
Tr 1 129 And whil she was dwellynge in that cite,
Tr 1 130 Kepte hir estat, and both of yonge and olde
Tr 1 131 Ful wel biloved, and wel men of hir tolde.
Tr 1 132 But wheither that she children hadde or noon,
Tr 1 133 I rede it naught, therfore I late it goon.
Tr 1 134 The thynges fellen, as they don of werre,
Tr 1 135 Bitwixen hem of Troie and Grekes ofte;
Tr 1 136 For som day boughten they of Troie it derre,
Tr 1 137 And eft the Grekes founden nothing softe
Tr 1 138 The folk of Troie; and thus Fortune on lofte
Tr 1 139 And under eft gan hem to whielen bothe
Tr 1 140 Aftir hir course, ay whil that thei were wrothe.
Tr 1 141 But how this town com to destruccion
Tr 1 142 Ne falleth naught to purpos me to telle,
Tr 1 143 For it were a long digression
Tr 1 144 Fro my matere, and yow to long to dwelle.
Tr 1 145 But the Troian gestes, as they felle,
Tr 1 146 In Omer, or in Dares, or in Dite,
Tr 1 147 Whoso that kan may rede hem as they write.
Tr 1 148 But though that Grekes hem of Troie shetten,
Tr 1 149 And hir cite biseged al aboute,
Tr 1 150 Hire olde usage nolde they nat letten,
Tr 1 151 As for to honoure hir goddes ful devoute;
Tr 1 152 But aldirmost in honour, out of doute,
Tr 1 153 Thei hadde a relik, heet Palladion,
Tr 1 154 That was hire trist aboven everichon.
Tr 1 155 And so bifel, whan comen was the tyme
Tr 1 156 Of Aperil, whan clothed is the mede
Tr 1 157 With newe grene, of lusty Veer the pryme,
Tr 1 158 And swote smellen floures white and rede,
Tr 1 159 In sondry wises shewed, as I rede,
Tr 1 160 The folk of Troie hire observaunces olde,
Tr 1 161 Palladiones feste for to holde.
Tr 1 162 And to the temple, in al hir beste wise,
Tr 1 163 In general ther wente many a wight,
Tr 1 164 To herknen of Palladions servyce;
Tr 1 165 And namely, so many a lusty knyght,
Tr 1 166 So many a lady fressh and mayden bright,
Tr 1 167 Ful wel arayed, both meeste, mene, and leste,
Tr 1 168 Ye, bothe for the seson and the feste.
Tr 1 169 Among thise othere folk was Criseyda,
Tr 1 170 In widewes habit blak; but natheles,
Tr 1 171 Right as oure firste lettre is now an A,
Tr 1 172 In beaute first so stood she, makeles.
Tr 1 173 Hire goodly lokyng gladed al the prees.
Tr 1 174 Nas nevere yet seyn thyng to ben preysed derre,
Tr 1 175 Nor under cloude blak so bright a sterre
Tr 1 176 As was Criseyde, as folk seyde everichone
Tr 1 177 That hir behelden in hir blake wede.
Tr 1 178 And yet she stood ful lowe and stille allone,
Tr 1 179 Byhynden other folk, in litel brede,
Tr 1 180 And neigh the dore, ay undre shames drede,
Tr 1 181 Simple of atir and debonaire of chere,
Tr 1 182 With ful assured lokyng and manere.
Tr 1 183 This Troilus, as he was wont to gide
Tr 1 184 His yonge knyghtes, lad hem up and down
Tr 1 185 In thilke large temple on every side,
Tr 1 186 Byholding ay the ladies of the town,
Tr 1 187 Now here, now there; for no devocioun
Tr 1 188 Hadde he to non, to reven hym his reste,
Tr 1 189 But gan to preise and lakken whom hym leste.
Tr 1 190 And in his walk ful faste he gan to wayten
Tr 1 191 If knyght or squyer of his compaignie
Tr 1 192 Gan for to syke, or lete his eighen baiten
Tr 1 193 On any womman that he koude espye.
Tr 1 194 He wolde smyle and holden it folye,
Tr 1 195 And seye hym thus, “God woot, she slepeth softe
Tr 1 196 For love of the, whan thow turnest ful ofte!
Tr 1 197 “I have herd told, pardieux, of youre lyvynge,
Tr 1 198 Ye loveres, and youre lewed observaunces,
Tr 1 199 And which a labour folk han in wynnynge
Tr 1 200 Of love, and in the kepyng which doutaunces;
Tr 1 201 And whan youre prey is lost, woo and penaunces.
Tr 1 202 O veray fooles, nyce and blynde be ye!
Tr 1 203 Ther nys nat oon kan war by other be.”
Tr 1 204 And with that word he gan caste up the browe,
Tr 1 205 Ascaunces, “Loo! is this naught wisely spoken?”
Tr 1 206 At which the God of Love gan loken rowe
Tr 1 207 Right for despit, and shop for to ben wroken.
Tr 1 208 He kidde anon his bowe nas naught broken;
Tr 1 209 For sodeynly he hitte hym atte fulle —
Tr 1 210 And yet as proud a pekok kan he pulle.
Tr 1 211 O blynde world, O blynde entencioun!
Tr 1 212 How often falleth al the effect contraire
Tr 1 213 Of surquidrie and foul presumpcioun;
Tr 1 214 For kaught is proud, and kaught is debonaire.
Tr 1 215 This Troilus is clomben on the staire,
Tr 1 216 And litel weneth that he moot descenden;
Tr 1 217 But alday faileth thing that fooles wenden.
Tr 1 218 As proude Bayard gynneth for to skippe
Tr 1 219 Out of the weye, so pryketh hym his corn,
Tr 1 220 Til he a lasshe have of the longe whippe —
Tr 1 221 Than thynketh he, “Though I praunce al byforn
Tr 1 222 First in the trays, ful fat and newe shorn,
Tr 1 223 Yet am I but an hors, and horses lawe
Tr 1 224 I moot endure, and with my feres drawe” —
Tr 1 225 So ferde it by this fierse and proude knyght:
Tr 1 226 Though he a worthy kynges sone were,
Tr 1 227 And wende nothing hadde had swich myght
Tr 1 228 Ayeyns his wille that shuld his herte stere,
Tr 1 229 Yet with a look his herte wex a-fere,
Tr 1 230 That he that now was moost in pride above,
Tr 1 231 Wax sodeynly moost subgit unto love.
Tr 1 232 Forthy ensample taketh of this man,
Tr 1 233 Ye wise, proude, and worthi folkes alle,
Tr 1 234 To scornen Love, which that so soone kan
Tr 1 235 The fredom of youre hertes to hym thralle;
Tr 1 236 For evere it was, and evere it shal byfalle,
Tr 1 237 That Love is he that alle thing may bynde,
Tr 1 238 For may no man fordon the lawe of kynde.
Tr 1 239 That this be soth, hath preved and doth yit.
Tr 1 240 For this trowe I ye knowen alle or some,
Tr 1 241 Men reden nat that folk han gretter wit
Tr 1 242 Than they that han be most with love ynome;
Tr 1 243 And strengest folk ben therwith overcome,
Tr 1 244 The worthiest and grettest of degree:
Tr 1 245 This was, and is, and yet men shall it see.
Tr 1 246 And trewelich it sit wel to be so,
Tr 1 247 For alderwisest han therwith ben plesed;
Tr 1 248 And they that han ben aldermost in wo,
Tr 1 249 With love han ben comforted moost and esed;
Tr 1 250 And ofte it hath the cruel herte apesed,
Tr 1 251 And worthi folk maad worthier of name,
Tr 1 252 And causeth moost to dreden vice and shame.
Tr 1 253 Now sith it may nat goodly ben withstonde,
Tr 1 254 And is a thing so vertuous in kynde,
Tr 1 255 Refuseth nat to Love for to ben bonde,
Tr 1 256 Syn, as hymselven liste, he may yow bynde;
Tr 1 257 The yerde is bet that bowen wole and wynde
Tr 1 258 Than that that brest, and therfore I yow rede
Tr 1 259 To folowen hym that so wel kan yow lede.
Tr 1 260 But for to tellen forth in special
Tr 1 261 Of this kynges sone of which I tolde,
Tr 1 262 And leten other thing collateral,
Tr 1 263 Of hym thenke I my tale forth to holde,
Tr 1 264 Both of his joie and of his cares colde;
Tr 1 265 And al his werk, as touching this matere,
Tr 1 266 For I it gan, I wol therto refere.
Tr 1 267 Withinne the temple he wente hym forth pleyinge,
Tr 1 268 This Troilus, of every wight aboute,
Tr 1 269 On this lady, and now on that, lokynge,
Tr 1 270 Wher so she were of town or of withoute;
Tr 1 271 And upon cas bifel that thorugh a route
Tr 1 272 His eye percede, and so depe it wente,
Tr 1 273 Til on Criseyde it smot, and ther it stente.
Tr 1 274 And sodeynly he wax therwith astoned,
Tr 1 275 And gan hir bet biholde in thrifty wise.
Tr 1 276 “O mercy, God,” thoughte he, “wher hastow woned,
Tr 1 277 That art so feyr and goodly to devise?”
Tr 1 278 Therwith his herte gan to sprede and rise,
Tr 1 279 And softe sighed, lest men myghte hym here,
Tr 1 280 And caught ayeyn his firste pleyinge chere.
Tr 1 281 She nas nat with the leste of hire stature,
Tr 1 282 But alle hire lymes so wel answerynge
Tr 1 283 Weren to wommanhod, that creature
Tr 1 284 Was nevere lasse mannyssh in semynge;
Tr 1 285 And ek the pure wise of hire mevynge
Tr 1 286 Shewed wel that men myght in hire gesse
Tr 1 287 Honour, estat, and wommanly noblesse.
Tr 1 288 To Troilus right wonder wel with alle
Tr 1 289 Gan for to like hire mevynge and hire chere,
Tr 1 290 Which somdel deignous was, for she let falle
Tr 1 291 Hire look a lite aside in swich manere,
Tr 1 292 Ascaunces, “What, may I nat stonden here?”
Tr 1 293 And after that hir lokynge gan she lighte,
Tr 1 294 That nevere thoughte hym seen so good a syghte.
Tr 1 295 And of hire look in him ther gan to quyken
Tr 1 296 So gret desir and such affeccioun,
Tr 1 297 That in his herte botme gan to stiken
Tr 1 298 Of hir his fixe and depe impressioun.
Tr 1 299 And though he erst hadde poured up and down,
Tr 1 300 He was tho glad his hornes in to shrinke:
Tr 1 301 Unnethes wiste he how to loke or wynke.
Tr 1 302 Lo, he that leet hymselven so konnynge,
Tr 1 303 And scorned hem that Loves peynes dryen,
Tr 1 304 Was ful unwar that Love hadde his dwellynge
Tr 1 305 Withinne the subtile stremes of hire yen;
Tr 1 306 That sodeynly hym thoughte he felte dyen,
Tr 1 307 Right with hire look, the spirit in his herte:
Tr 1 308 Blissed be Love, that kan thus folk converte!
Tr 1 309 She, this in blak, likynge to Troilus
Tr 1 310 Over alle thing, he stood for to biholde;
Tr 1 311 Ne his desir, ne wherfore he stood thus,
Tr 1 312 He neither chere made, ne word tolde;
Tr 1 313 But from afer, his manere for to holde,
Tr 1 314 On other thing his look som tyme he caste,
Tr 1 315 And eft on hire, whil that servyse laste.
Tr 1 316 And after this, nat fullich al awhaped,
Tr 1 317 Out of the temple al esilich he wente,
Tr 1 318 Repentynge hym that he hadde evere ijaped
Tr 1 319 Of Loves folk, lest fully the descente
Tr 1 320 Of scorn fille on hymself; but what he mente,
Tr 1 321 Lest it were wist on any manere syde,
Tr 1 322 His woo he gan dissimilen and hide.
Tr 1 323 Whan he was fro the temple thus departed,
Tr 1 324 He streght anon unto his paleys torneth.
Tr 1 325 Right with hire look thorugh-shoten and thorugh-darted,
Tr 1 326 Al feyneth he in lust that he sojorneth,
Tr 1 327 And al his chere and speche also he borneth,
Tr 1 328 And ay of Loves servantz every while,
Tr 1 329 Hymself to wrye, at hem he gan to smyle,
Tr 1 330 And seyde, “Lord, so ye lyve al in lest,
Tr 1 331 Ye loveres! For the konnyngeste of yow,
Tr 1 332 That serveth most ententiflich and best,
Tr 1 333 Hym tit as often harm therof as prow.
Tr 1 334 Youre hire is quyt ayeyn, ye, God woot how!
Tr 1 335 Nought wel for wel, but scorn for good servyse.
Tr 1 336 In feith, youre ordre is ruled in good wise!
Tr 1 337 “In nouncerteyn ben alle youre observaunces,
Tr 1 338 But it a sely fewe pointes be;
Tr 1 339 Ne no thing asketh so gret attendaunces
Tr 1 340 As doth youre lay, and that knowe alle ye;
Tr 1 341 But that is nat the worste, as mote I the!
Tr 1 342 But, tolde I yow the worste point, I leve,
Tr 1 343 Al seyde I soth, ye wolden at me greve.
Tr 1 344 “But take this: that ye loveres ofte eschuwe,
Tr 1 345 Or elles doon, of good entencioun,
Tr 1 346 Ful ofte thi lady wol it mysconstruwe,
Tr 1 347 And deme it harm in hire oppynyoun;
Tr 1 348 And yet if she, for other enchesoun,
Tr 1 349 Be wroth, than shaltow have a groyn anon.
Tr 1 350 Lord, wel is hym that may ben of yow oon!”
Tr 1 351 But for al this, whan that he say his tyme,
Tr 1 352 He held his pees — non other boote hym gayned —
Tr 1 353 For love bigan his fetheres so to lyme
Tr 1 354 That wel unnethe until his folk he fayned
Tr 1 355 That other besy nedes hym destrayned;
Tr 1 356 For wo was hym, that what to doon he nyste,
Tr 1 357 But bad his folk to gon wher that hem liste.
Tr 1 358 And whan that he in chambre was allone,
Tr 1 359 He doun upon his beddes feet hym sette,
Tr 1 360 And first he gan to sike, and eft to grone,
Tr 1 361 And thought ay on hire so, withouten lette,
Tr 1 362 That, as he sat and wook, his spirit mette
Tr 1 363 That he hire saugh a-temple, and al the wise
Tr 1 364 Right of hire look, and gan it newe avise.
Tr 1 365 Thus gan he make a mirour of his mynde
Tr 1 366 In which he saugh al holly hire figure,
Tr 1 367 And that he wel koude in his herte fynde.
Tr 1 368 It was to hym a right good aventure
Tr 1 369 To love swich oon, and if he dede his cure
Tr 1 370 To serven hir, yet myghte he falle in grace,
Tr 1 371 Or ellis for oon of hire servantz pace.
Tr 1 372 Imagenynge that travaille nor grame
Tr 1 373 Ne myghte for so goodly oon be lorn
Tr 1 374 As she, ne hym for his desir no shame,
Tr 1 375 Al were it wist, but in pris and up-born
Tr 1 376 Of alle lovers wel more than biforn,
Tr 1 377 Thus argumented he in his gynnynge,
Tr 1 378 Ful unavysed of his woo comynge.
Tr 1 379 Thus took he purpos loves craft to suwe,
Tr 1 380 And thoughte he wolde werken pryvely,
Tr 1 381 First to hiden his desir in muwe
Tr 1 382 From every wight yborn, al outrely,
Tr 1 383 But he myghte ought recovered be therby,
Tr 1 384 Remembryng hym that love to wide yblowe
Tr 1 385 Yelt bittre fruyt, though swete seed be sowe.
Tr 1 386 And over al this, yet muchel more he thoughte
Tr 1 387 What for to speke, and what to holden inne;
Tr 1 388 And what to arten hire to love he soughte,
Tr 1 389 And on a song anon-right to bygynne,
Tr 1 390 And gan loude on his sorwe for to wynne;
Tr 1 391 For with good hope he gan fully assente
Tr 1 392 Criseyde for to love, and nought repente.
Tr 1 393 And of his song naught only the sentence,
Tr 1 394 As writ myn auctour called Lollius,
Tr 1 395 But pleinly, save oure tonges difference,
Tr 1 396 I dar wel seyn, in al, that Troilus
Tr 1 397 Seyde in his song, loo, every word right thus
Tr 1 398 As I shal seyn; and whoso list it here,
Tr 1 399 Loo, next this vers he may it fynden here.
Tr 1 400 “If no love is, O God, what fele I so?
Tr 1 401 And if love is, what thing and which is he?
Tr 1 402 If love be good, from whennes cometh my woo?
Tr 1 403 If it be wikke, a wonder thynketh me,
Tr 1 404 When every torment and adversite
Tr 1 405 That cometh of hym may to me savory thinke,
Tr 1 406 For ay thurst I, the more that ich it drynke.
Tr 1 407 “And if that at myn owen lust I brenne,
Tr 1 408 From whennes cometh my waillynge and my pleynte?
Tr 1 409 If harm agree me, wherto pleyne I thenne?
Tr 1 410 I noot, ne whi unwery that I feynte.
Tr 1 411 O quike deth, O swete harm so queynte,
Tr 1 412 How may of the in me swich quantite,
Tr 1 413 But if that I consente that it be?
Tr 1 414 “And if that I consente, I wrongfully
Tr 1 415 Compleyne, iwis. Thus possed to and fro,
Tr 1 416 Al sterelees withinne a boot am I
Tr 1 417 Amydde the see, bitwixen wyndes two,
Tr 1 418 That in contrarie stonden evere mo.
Tr 1 419 Allas, what is this wondre maladie?
Tr 1 420 For hote of cold, for cold of hote, I dye.”
Tr 1 421 And to the God of Love thus seyde he
Tr 1 422 With pitous vois, “O lord, now youres is
Tr 1 423 My spirit, which that oughte youres be.
Tr 1 424 Yow thanke I, lord, that han me brought to this.
Tr 1 425 But wheither goddesse or womman, iwis,
Tr 1 426 She be, I not, which that ye do me serve;
Tr 1 427 But as hire man I wol ay lyve and sterve.
Tr 1 428 “Ye stonden in hir eighen myghtily,
Tr 1 429 As in a place unto youre vertu digne;
Tr 1 430 Wherfore, lord, if my service or I
Tr 1 431 May liken yow, so beth to me benigne;
Tr 1 432 For myn estat roial I here resigne
Tr 1 433 Into hire hond, and with ful humble chere
Tr 1 434 Bicome hir man, as to my lady dere.”
Tr 1 435 In hym ne deyned spare blood roial
Tr 1 436 The fyr of love — wherfro God me blesse —
Tr 1 437 Ne him forbar in no degree, for al
Tr 1 438 His vertu or his excellent prowesse,
Tr 1 439 But held hym as his thral lowe in destresse,
Tr 1 440 And brende hym so in soundry wise ay newe,
Tr 1 441 That sexti tyme a day he loste his hewe.
Tr 1 442 So muche, day by day, his owene thought,
Tr 1 443 For lust to hire, gan quiken and encresse,
Tr 1 444 That every other charge he sette at nought.
Tr 1 445 Forthi ful ofte, his hote fir to cesse,
Tr 1 446 To sen hire goodly lok he gan to presse;
Tr 1 447 For therby to ben esed wel he wende,
Tr 1 448 And ay the ner he was, the more he brende.
Tr 1 449 For ay the ner the fir, the hotter is —
Tr 1 450 This, trowe I, knoweth al this compaignye;
Tr 1 451 But were he fer or ner, I dar sey this:
Tr 1 452 By nyght or day, for wisdom or folye,
Tr 1 453 His herte, which that is his brestez ye,
Tr 1 454 Was ay on hire, that fairer was to sene
Tr 1 455 Than evere were Eleyne or Polixene.
Tr 1 456 Ek of the day ther passed nought an houre
Tr 1 457 That to hymself a thousand tyme he seyde,
Tr 1 458 “Good goodly, to whom serve I and laboure
Tr 1 459 As I best kan, now wolde God, Criseyde,
Tr 1 460 Ye wolden on me rewe, er that I deyde!
Tr 1 461 My dere herte, allas, myn hele and hewe
Tr 1 462 And lif is lost, but ye wol on me rewe!”
Tr 1 463 Alle other dredes weren from him fledde,
Tr 1 464 Both of th’ assege and his savacioun;
Tr 1 465 N’ yn him desir noon other fownes bredde,
Tr 1 466 But argumentes to his conclusioun:
Tr 1 467 That she of him wolde han compassioun,
Tr 1 468 And he to ben hire man while he may dure.
Tr 1 469 Lo, here his lif, and from the deth his cure!
Tr 1 470 The sharpe shoures felle of armes preve
Tr 1 471 That Ector or his othere brethren diden
Tr 1 472 Ne made hym only therfore ones meve;
Tr 1 473 And yet was he, where so men wente or riden,
Tr 1 474 Founde oon the beste, and longest tyme abiden
Tr 1 475 Ther peril was, and dide ek swich travaille
Tr 1 476 In armes, that to thenke it was merveille.
Tr 1 477 But for non hate he to the Grekes hadde,
Tr 1 478 Ne also for the rescous of the town,
Tr 1 479 Ne made hym thus in armes for to madde,
Tr 1 480 But only, lo, for this conclusioun:
Tr 1 481 To liken hire the bet for his renoun.
Tr 1 482 Fro day to day in armes so he spedde
Tr 1 483 That the Grekes as the deth him dredde.
Tr 1 484 And fro this forth tho refte hym love his slep,
Tr 1 485 And made his mete his foo, and ek his sorwe
Tr 1 486 Gan multiplie, that, whoso tok kep,
Tr 1 487 It shewed in his hewe both eve and morwe.
Tr 1 488 Therfor a title he gan him for to borwe
Tr 1 489 Of other siknesse, lest men of hym wende
Tr 1 490 That the hote fir of love hym brende,
Tr 1 491 And seyde he hadde a fevere and ferde amys.
Tr 1 492 But how it was, certeyn, kan I nat seye,
Tr 1 493 If that his lady understood nat this,
Tr 1 494 Or feynede hire she nyste, oon of the tweye;
Tr 1 495 But wel I rede that, by no manere weye,
Tr 1 496 Ne semed it that she of hym roughte,
Tr 1 497 Or of his peyne, or whatsoevere he thoughte.
Tr 1 498 But thanne felte this Troilus swich wo
Tr 1 499 That he was wel neigh wood; for ay his drede
Tr 1 500 Was this, that she som wight hadde loved so,
Tr 1 501 That nevere of hym she wolde han taken hede,
Tr 1 502 For which hym thoughte he felte his herte blede;
Tr 1 503 Ne of his wo ne dorste he nat bygynne
Tr 1 504 To tellen hir, for al this world to wynne.
Tr 1 505 But whan he hadde a space from his care,
Tr 1 506 Thus to hymself ful ofte he gan to pleyne;
Tr 1 507 He seyde, “O fool, now artow in the snare,
Tr 1 508 That whilom japedest at loves peyne.
Tr 1 509 Now artow hent, now gnaw thin owen cheyne!
Tr 1 510 Thow were ay wont ech lovere reprehende
Tr 1 511 Of thing fro which thou kanst the nat defende.
Tr 1 512 “What wol now every lovere seyn of the,
Tr 1 513 If this be wist, but evere in thin absence
Tr 1 514 Laughen in scorn, and seyn, ‘Loo, ther goth he
Tr 1 515 That is the man of so gret sapience,
Tr 1 516 That held us loveres leest in reverence.
Tr 1 517 Now, thanked God, he may gon in the daunce
Tr 1 518 Of hem that Love list febly for to avaunce.’
Tr 1 519 “But, O thow woful Troilus, God wolde,
Tr 1 520 Sith thow most loven thorugh thi destine,
Tr 1 521 That thow beset were on swich oon that sholde
Tr 1 522 Know al thi wo, al lakked hir pitee!
Tr 1 523 But also cold in love towardes the
Tr 1 524 Thi lady is as frost in wynter moone,
Tr 1 525 And thow fordon as snow in fire is soone.
Tr 1 526 “God wold I were aryved in the port
Tr 1 527 Of deth, to which my sorwe wol me lede!
Tr 1 528 A, Lord, to me it were a gret comfort;
Tr 1 529 Than were I quyt of languisshyng in drede;
Tr 1 530 For, be myn hidde sorwe iblowe on brede,
Tr 1 531 I shal byjaped ben a thousand tyme
Tr 1 532 More than that fol of whos folie men ryme.
Tr 1 533 “But now help, God, and ye, swete, for whom
Tr 1 534 I pleyne, ikaught, ye, nevere wight so faste!
Tr 1 535 O mercy, dere herte, and help me from
Tr 1 536 The deth, for I, whil that my lyf may laste,
Tr 1 537 More than myself wol love yow to my laste;
Tr 1 538 And with som frendly lok gladeth me, swete,
Tr 1 539 Though nevere more thing ye me byheete.”
Tr 1 540 Thise wordes, and ful many an other to,
Tr 1 541 He spak, and called evere in his compleynte
Tr 1 542 Hire name, for to tellen hire his wo,
Tr 1 543 Til neigh that he in salte teres dreynte.
Tr 1 544 Al was for nought: she herde nat his pleynte;
Tr 1 545 And whan that he bythought on that folie,
Tr 1 546 A thousand fold his wo gan multiplie.
Tr 1 547 Bywayling in his chambre thus allone,
Tr 1 548 A frend of his that called was Pandare
Tr 1 549 Com oones in unwar, and herde hym groone,
Tr 1 550 And say his frend in swich destresse and care:
Tr 1 551 “Allas,” quod he, “who causeth al this fare?
Tr 1 552 O mercy, God! What unhap may this meene?
Tr 1 553 Han now thus soone Grekes maad yow leene?
Tr 1 554 “Or hastow som remors of conscience,
Tr 1 555 And art now falle in som devocioun,
Tr 1 556 And wailest for thi synne and thin offence,
Tr 1 557 And hast for ferde caught attricioun?
Tr 1 558 God save hem that biseged han oure town,
Tr 1 559 That so kan leye oure jolite on presse,
Tr 1 560 And bringe oure lusty folk to holynesse!”
Tr 1 561 Thise wordes seyde he for the nones alle,
Tr 1 562 That with swich thing he myght hym angry maken,
Tr 1 563 And with angre don his wo to falle,
Tr 1 564 As for the tyme, and his corage awaken.
Tr 1 565 But wel he wist, as fer as tonges spaken,
Tr 1 566 Ther nas a man of gretter hardinesse
Tr 1 567 Thanne he, ne more desired worthinesse.
Tr 1 568 “What cas,” quod Troilus, “or what aventure
Tr 1 569 Hath gided the to sen me langwisshinge,
Tr 1 570 That am refus of every creature?
Tr 1 571 But for the love of God, at my preyinge,
Tr 1 572 Go hennes awey; for certes my deyinge
Tr 1 573 Wol the disese, and I mot nedes deye;
Tr 1 574 Therfore go wey, ther is na more to seye.
Tr 1 575 “But if thow wene I be thus sik for drede,
Tr 1 576 It is naught so, and therfore scorne nought.
Tr 1 577 Ther is another thing I take of hede
Tr 1 578 Wel more than aught the Grekes han yet wrought,
Tr 1 579 Which cause is of my deth, for sorowe and thought;
Tr 1 580 But though that I now telle it the ne leste,
Tr 1 581 Be thow naught wroth; I hide it for the beste.”
Tr 1 582 This Pandare, that neigh malt for wo and routhe,
Tr 1 583 Ful ofte seyde, “Allas, what may this be?
Tr 1 584 Now frend,” quod he, “if evere love or trouthe
Tr 1 585 Hath ben, or is, bitwixen the and me,
Tr 1 586 Ne do thow nevere swich a crueltee
Tr 1 587 To hiden fro thi frend so gret a care!
Tr 1 588 Wostow naught wel that it am I, Pandare?
Tr 1 589 “I wol parten with the al thi peyne,
Tr 1 590 If it be so I do the no comfort,
Tr 1 591 As it is frendes right, soth for to seyne,
Tr 1 592 To entreparten wo as glad desport.
Tr 1 593 I have, and shal, for trewe or fals report,
Tr 1 594 In wrong and right iloved the al my lyve:
Tr 1 595 Hid nat thi wo fro me, but telle it blyve.”
Tr 1 596 Than gan this sorwful Troylus to syke,
Tr 1 597 And seide hym thus: “God leve it be my beste
Tr 1 598 To telle it the; for sith it may the like,
Tr 1 599 Yet wol I telle it, though myn herte breste.
Tr 1 600 And wel woot I thow mayst do me no reste;
Tr 1 601 But lest thow deme I truste nat to the,
Tr 1 602 Now herke, frend, for thus it stant with me.
Tr 1 603 “Love, ayeins the which whoso defendeth
Tr 1 604 Hymselven most, hym alderlest avaylleth,
Tr 1 605 With disespeyr so sorwfulli me offendeth,
Tr 1 606 That streight unto the deth myn herte sailleth.
Tr 1 607 Therto desir so brennyngly me assailleth,
Tr 1 608 That to ben slayn it were a gretter joie
Tr 1 609 To me than kyng of Grece ben and Troye.
Tr 1 610 “Suffiseth this, my fulle frend Pandare,
Tr 1 611 That I have seyd, for now wostow my wo;
Tr 1 612 And for the love of God, my colde care,
Tr 1 613 So hide it wel — I tolde it nevere to mo,
Tr 1 614 For harmes myghten folwen mo than two
Tr 1 615 If it were wist — but be thow in gladnesse,
Tr 1 616 And lat me sterve, unknowe, of my destresse.”
Tr 1 617 “How hastow thus unkyndely and longe
Tr 1 618 Hid this fro me, thow fol?” quod Pandarus.
Tr 1 619 “Paraunter thow myghte after swich oon longe,
Tr 1 620 That myn avys anoon may helpen us.”
Tr 1 621 “This were a wonder thing,” quod Troilus;
Tr 1 622 “Thow koudest nevere in love thiselven wisse.
Tr 1 623 How devel maistow brynge me to blisse?”
Tr 1 624 “Ye, Troilus, now herke,” quod Pandare;
Tr 1 625 “Though I be nyce, it happeth often so,
Tr 1 626 That oon that excesse doth ful yvele fare
Tr 1 627 By good counseil kan kepe his frend therfro.
Tr 1 628 I have myself ek seyn a blynd man goo
Tr 1 629 Ther as he fel that couth. loken wide;
Tr 1 630 A fool may ek a wis-man ofte gide.
Tr 1 631 “A wheston is no kervyng instrument,
Tr 1 632 But yet it maketh sharppe kervyng tolis;
Tr 1 633 And there thow woost that I have aught myswent,
Tr 1 634 Eschuw thow that, for swich thing to the scole is.
Tr 1 635 Thus often wise men ben war by foolys.
Tr 1 636 If thow do so, thi wit is wel bewared;
Tr 1 637 By his contrarie is every thyng declared.
Tr 1 638 “For how myghte evere swetnesse han ben knowe
Tr 1 639 To him that nevere tasted bitternesse?
Tr 1 640 Ne no man may ben inly glad, I trowe,
Tr 1 641 That nevere was in sorwe or som destresse.
Tr 1 642 Eke whit by blak, by shame ek worthinesse,
Tr 1 643 Ech set by other, more for other semeth,
Tr 1 644 As men may se, and so the wyse it demeth.
Tr 1 645 “Sith thus of two contraries is o lore,
Tr 1 646 I, that have in love so ofte assayed
Tr 1 647 Grevances, oughte konne, and wel the more,
Tr 1 648 Counseillen the of that thow art amayed.
Tr 1 649 Ek the ne aughte nat ben yvel appayed,
Tr 1 650 Though I desyre with the for to bere
Tr 1 651 Thyn hevy charge; it shal the lasse dere.
Tr 1 652 “I woot wel that it fareth thus be me
Tr 1 653 As to thi brother, Paris, an herdesse
Tr 1 654 Which that icleped was Oenone
Tr 1 655 Wrot in a compleynte of hir hevynesse.
Tr 1 656 Yee say the lettre that she wrot, I gesse?”
Tr 1 657 “Nay, nevere yet, ywys,” quod Troilus.
Tr 1 658 “Now,” quod Pandare, “herkne, it was thus:
Tr 1 659 “‘Phebus, that first fond art of medicyne,’
Tr 1 660 Quod she, ‘and couth. in every wightes care
Tr 1 661 Remedye and reed, by herbes he knew fyne,
Tr 1 662 Yet to hymself his konnyng was ful bare,
Tr 1 663 For love hadde hym so bounden in a snare,
Tr 1 664 Al for the doughter of the kyng Amete,
Tr 1 665 That al his craft ne koude his sorwes bete.’
Tr 1 666 “Right so fare I, unhappyly for me.
Tr 1 667 I love oon best, and that me smerteth sore;
Tr 1 668 And yet, peraunter, kan I reden the
Tr 1 669 And nat myself; repreve me na more.
Tr 1 670 I have no cause, I woot wel, for to sore
Tr 1 671 As doth an hauk that listeth for to pleye;
Tr 1 672 But to thin help yet somwhat kan I seye.
Tr 1 673 “And of o thing right siker maistow be,
Tr 1 674 That certein, for to dyen in the peyne,
Tr 1 675 That I shal nevere mo discoveren the;
Tr 1 676 Ne, by my trouthe, I kepe nat restreyne
Tr 1 677 The fro thi love, theigh that it were Eleyne
Tr 1 678 That is thi brother wif, if ich it wiste:
Tr 1 679 Be what she be, and love hire as the liste!
Tr 1 680 “Therfore, as frend, fullich in me assure,
Tr 1 681 And tel me plat what is th’ enchesoun
Tr 1 682 And final cause of wo that ye endure;
Tr 1 683 For douteth nothyng, myn entencioun
Tr 1 684 Nis nat to yow of reprehencioun,
Tr 1 685 To speke as now, for no wight may byreve
Tr 1 686 A man to love, tyl that hym list to leve.
Tr 1 687 “And witteth wel that bothe two ben vices:
Tr 1 688 Mistrusten alle, or elles alle leve.
Tr 1 689 But wel I woot, the mene of it no vice is,
Tr 1 690 For to trusten som wight is a preve
Tr 1 691 Of trouth; and forthi wolde I fayn remeve
Tr 1 692 Thi wrong conseyte, and do the som wyght triste
Tr 1 693 Thi wo to telle; and tel me, if the liste.
Tr 1 694 “The wise seith, ‘Wo hym that is allone,
Tr 1 695 For, and he falle, he hath non helpe to ryse’;
Tr 1 696 And sith thow hast a felawe, tel thi mone;
Tr 1 697 For this nys naught, certein, the nexte wyse
Tr 1 698 To wynnen love — as techen us the wyse —
Tr 1 699 To walwe and wepe as Nyobe the queene,
Tr 1 700 Whos teres yet in marble ben yseene.
Tr 1 701 “Lat be thy wepyng and thi drerynesse,
Tr 1 702 And lat us lissen wo with oother speche;
Tr 1 703 So may thy woful tyme seme lesse.
Tr 1 704 Delyte nat in wo thi wo to seche,
Tr 1 705 As don thise foles that hire sorwes eche
Tr 1 706 With sorwe, whan thei han mysaventure,
Tr 1 707 And listen naught to seche hem other cure.
Tr 1 708 “Men seyn, ‘to wrecche is consolacioun
Tr 1 709 To have another felawe in hys peyne.’
Tr 1 710 That owghte wel ben oure opynyoun,
Tr 1 711 For bothe thow and I of love we pleyne.
Tr 1 712 So ful of sorwe am I, soth for to seyne,
Tr 1 713 That certeinly namore harde grace
Tr 1 714 May sitte on me, for-why ther is no space.
Tr 1 715 “If God wol, thow art nat agast of me,
Tr 1 716 Lest I wolde of thi lady the bygyle!
Tr 1 717 Thow woost thyself whom that I love, parde,
Tr 1 718 As I best kan, gon sithen longe while.
Tr 1 719 And sith thow woost I do it for no wyle,
Tr 1 720 And sith I am he that thow trustest moost,
Tr 1 721 Tel me somwhat, syn al my wo thow woost.”
Tr 1 722 Yet Troilus for al this no word seyde,
Tr 1 723 But longe he ley as stylle as he ded were;
Tr 1 724 And after this with sikynge he abreyde,
Tr 1 725 And to Pandarus vois he lente his ere,
Tr 1 726 And up his eighen caste he, that in feere
Tr 1 727 Was Pandarus, lest that in frenesie
Tr 1 728 He sholde falle, or elles soone dye;
Tr 1 729 And cryde “Awake!” ful wonderlich and sharpe;
Tr 1 730 “What! Slombrestow as in a litargie?
Tr 1 731 Or artow lik an asse to the harpe,
Tr 1 732 That hereth sown whan men the strynges plye,
Tr 1 733 But in his mynde of that no melodie
Tr 1 734 May sinken hym to gladen, for that he
Tr 1 735 So dul ys of his bestialite?”
Tr 1 736 And with that, Pandare of his wordes stente;
Tr 1 737 And Troilus yet hym nothyng answerde,
Tr 1 738 For-why to tellen nas nat his entente
Tr 1 739 To nevere no man, for whom that he so ferde;
Tr 1 740 For it is seyd, “Men maketh ofte a yerde
Tr 1 741 With which the maker is hymself ybeten
Tr 1 742 In sondry manere,” as thise wyse treten,
Tr 1 743 And namelich in his counseil tellynge
Tr 1 744 That toucheth love that oughte ben secree;
Tr 1 745 For of himself it wol ynough out sprynge,
Tr 1 746 But if that it the bet governed be.
Tr 1 747 Ek som tyme it is a craft to seme fle
Tr 1 748 Fro thyng whych in effect men hunte faste;
Tr 1 749 Al this gan Troilus in his herte caste.
Tr 1 750 But natheles, whan he hadde herd hym crye
Tr 1 751 “Awake!” he gan to syken wonder soore,
Tr 1 752 And seyde, “Frend, though that I stylle lye,
Tr 1 753 I am nat deef. Now pees, and crye namore,
Tr 1 754 For I have herd thi wordes and thi lore;
Tr 1 755 But suffre me my meschief to bywaille,
Tr 1 756 For thy proverbes may me naught availle.
Tr 1 757 “Nor other cure kanstow non for me;
Tr 1 758 Ek I nyl nat ben cured; I wol deye.
Tr 1 759 What knowe I of the queene Nyobe?
Tr 1 760 Lat be thyne olde ensaumples, I the preye.”
Tr 1 761 “No,” quod Pandarus, “therfore I seye,
Tr 1 762 Swych is delit of foles to bywepe
Tr 1 763 Hire wo, but seken bote they ne kepe.
Tr 1 764 “Now knowe I that ther reson in the failleth.
Tr 1 765 But tel me, if I wiste what she were
Tr 1 766 For whom that the al this mysaunter ailleth,
Tr 1 767 Dorstestow that I tolde in hire ere
Tr 1 768 Thi wo, sith thow darst naught thiself for feere,
Tr 1 769 And hire bysoughte on the to han som routhe?”
Tr 1 770 “Why, nay,” quod he, “by God and by my trouthe!”
Tr 1 771 “What, nat as bisyly,” quod Pandarus,
Tr 1 772 “As though myn owene lyf lay on this nede?”
Tr 1 773 “No, certes, brother,” quod this Troilus,
Tr 1 774 “And whi? For that thow scholdest nevere spede.”
Tr 1 775 “Wostow that wel?” — “Ye, that is out of drede,”
Tr 1 776 Quod Troilus; “for al that evere ye konne,
Tr 1 777 She nyl to noon swich wrecche as I ben wonne.”
Tr 1 778 Quod Pandarus, “Allas! What may this be,
Tr 1 779 That thow dispeired art thus causeles?
Tr 1 780 What! lyveth nat thi lady, bendiste?
Tr 1 781 How wostow so that thow art graceles?
Tr 1 782 Swich yvel is nat alwey booteles.
Tr 1 783 Why, put nat impossible thus thi cure,
Tr 1 784 Syn thyng to come is oft in aventure.
Tr 1 785 “I graunte wel that thow endurest wo
Tr 1 786 As sharp as doth he Ticius in helle,
Tr 1 787 Whos stomak foughles tiren evere moo
Tr 1 788 That hightyn volturis, as bokes telle;
Tr 1 789 But I may nat endure that thow dwelle
Tr 1 790 In so unskilful an oppynyoun
Tr 1 791 That of thi wo is no curacioun.
Tr 1 792 “But oones nyltow, for thy coward herte,
Tr 1 793 And for thyn ire and folissh wilfulnesse,
Tr 1 794 For wantrust, tellen of thy sorwes smerte,
Tr 1 795 Ne to thyn owen help don bysynesse
Tr 1 796 As muche as speke a resoun moore or lesse,
Tr 1 797 But list as he that lest of nothyng recche.
Tr 1 798 What womman koude loven swich a wrecche?
Tr 1 799 “What may she demen oother of thy deeth,
Tr 1 800 If thow thus deye, and she not why it is,
Tr 1 801 But that for feere is yolden up thy breth,
Tr 1 802 For Grekes han biseged us, iwys?
Tr 1 803 Lord, which a thonk than shaltow han of this!
Tr 1 804 Thus wol she seyn, and al the town attones,
Tr 1 805 ‘The wrecche is ded, the devel have his bones!’
Tr 1 806 “Thow mayst allone here wepe and crye and knele —
Tr 1 807 But love a womman that she woot it nought,
Tr 1 808 And she wol quyte it that thow shalt nat fele;
Tr 1 809 Unknowe, unkist, and lost that is unsought.
Tr 1 810 What, many a man hath love ful deere ybought
Tr 1 811 Twenty wynter that his lady wiste,
Tr 1 812 That nevere yet his lady mouth he kiste.
Tr 1 813 “What sholde he therfore fallen in dispayr,
Tr 1 814 Or be recreant for his owne tene,
Tr 1 815 Or slen hymself, al be his lady fair?
Tr 1 816 Nay, nay, but evere in oon be fressh and grene
Tr 1 817 To serve and love his deere hertes queene,
Tr 1 818 And thynk it is a guerdon hire to serve,
Tr 1 819 A thousand fold moore than he kan deserve.”
Tr 1 820 Of that word took hede Troilus,
Tr 1 821 And thoughte anon what folie he was inne,
Tr 1 822 And how that soth hym seyde Pandarus,
Tr 1 823 That for to slen hymself myght he nat wynne,
Tr 1 824 But bothe don unmanhod and a synne,
Tr 1 825 And of his deth his lady naught to wite;
Tr 1 826 For of his wo, God woot, she knew ful lite.
Tr 1 827 And with that thought he gan ful sore syke,
Tr 1 828 And seyde, “Allas! What is me best to do?”
Tr 1 829 To whom Pandare answered, “If the like,
Tr 1 830 The beste is that thow telle me al thi wo;
Tr 1 831 And have my trouthe, but thow it fynde so
Tr 1 832 I be thi boote, er that it be ful longe,
Tr 1 833 To pieces do me drawe and sithen honge!”
Tr 1 834 “Ye, so thow seyst,” quod Troilus tho, “allas!
Tr 1 835 But, God woot, it is naught the rather so.
Tr 1 836 Ful hard were it to helpen in this cas,
Tr 1 837 For wel fynde I that Fortune is my fo;
Tr 1 838 Ne al the men that riden konne or go
Tr 1 839 May of hire cruel whiel the harm withstonde;
Tr 1 840 For as hire list she pleyeth with free and bonde.”
Tr 1 841 Quod Pandarus, “Than blamestow Fortune
Tr 1 842 For thow art wroth; ye, now at erst I see.
Tr 1 843 Woost thow nat wel that Fortune is comune
Tr 1 844 To everi manere wight in som degree?
Tr 1 845 And yet thow hast this comfort, lo, parde,
Tr 1 846 That, as hire joies moten overgon,
Tr 1 847 So mote hire sorwes passen everechon.
Tr 1 848 “For if hire whiel stynte any thyng to torne,
Tr 1 849 Than cessed she Fortune anon to be.
Tr 1 850 Now, sith hire whiel by no way may sojourne,
Tr 1 851 What woostow if hire mutabilite
Tr 1 852 Right as thyselven list wol don by the,
Tr 1 853 Or that she be naught fer fro thyn helpynge?
Tr 1 854 Paraunter thow hast cause for to synge.
Tr 1 855 “And therfore wostow what I the biseche?
Tr 1 856 Lat be thy wo and tornyng to the grounde;
Tr 1 857 For whoso list have helyng of his leche,
Tr 1 858 To hym byhoveth first unwre his wownde.
Tr 1 859 To Cerberus yn helle ay be I bounde,
Tr 1 860 Were it for my suster, al thy sorwe,
Tr 1 861 By my wil she sholde al be thyn to-morwe.
Tr 1 862 “Look up, I seye, and telle me what she is
Tr 1 863 Anon, that I may gon about thy nede.
Tr 1 864 Knowe ich hire aught? For my love, telle me this.
Tr 1 865 Thanne wolde I hopen rather for to spede.”
Tr 1 866 Tho gan the veyne of Troilus to blede,
Tr 1 867 For he was hit, and wax al reed for shame.
Tr 1 868 “A ha!” quod Pandare; “Here bygynneth game.”
Tr 1 869 And with that word he gan hym for to shake,
Tr 1 870 And seyde, “Thef, thow shalt hyre name telle.”
Tr 1 871 But tho gan sely Troilus for to quake
Tr 1 872 As though men sholde han led hym into helle,
Tr 1 873 And seyde, “Allas, of al my wo the welle,
Tr 1 874 Thanne is my swete fo called Criseyde!”
Tr 1 875 And wel neigh with the word for feere he deide.
Tr 1 876 And whan that Pandare herde hire name nevene,
Tr 1 877 Lord, he was glad, and seyde, “Frend so deere,
Tr 1 878 Now far aright, for Joves name in hevene.
Tr 1 879 Love hath byset the wel; be of good cheere!
Tr 1 880 For of good name and wisdom and manere
Tr 1 881 She hath ynough, and ek of gentilesse.
Tr 1 882 If she be fayr, thow woost thyself, I gesse,
Tr 1 883 “Ne nevere saugh a more bountevous
Tr 1 884 Of hire estat, n’ a gladder, ne of speche
Tr 1 885 A frendlyer, n’ a more gracious
Tr 1 886 For to do wel, ne lasse hadde nede to seche
Tr 1 887 What for to don; and al this bet to eche,
Tr 1 888 In honour, to as fer as she may strecche,
Tr 1 889 A kynges herte semeth by hyrs a wrecche.
Tr 1 890 “And forthi loke of good comfort thow be;
Tr 1 891 For certeinly, the ferste poynt is this
Tr 1 892 Of noble corage and wel ordeyne,
Tr 1 893 A man to have pees with hymself, ywis.
Tr 1 894 So oghtist thow, for noht but good it is
Tr 1 895 To love wel, and in a worthy place;
Tr 1 896 The oghte not to clepe it hap, but grace.
Tr 1 897 “And also thynk, and therwith glade the,
Tr 1 898 That sith thy lady vertuous is al,
Tr 1 899 So foloweth it that there is some pitee
Tr 1 900 Amonges alle thise other in general;
Tr 1 901 And forthi se that thow, in special,
Tr 1 902 Requere naught that is ayeyns hyre name;
Tr 1 903 For vertu streccheth naught hymself to shame.
Tr 1 904 “But wel is me that evere that I was born,
Tr 1 905 That thow biset art in so good a place;
Tr 1 906 For by my trouthe, in love I dorste have sworn
Tr 1 907 The sholde nevere han tid thus fayr a grace.
Tr 1 908 And wostow why? For thow were wont to chace
Tr 1 909 At Love in scorn, and for despit him calle
Tr 1 910 ‘Seynt Idiot, lord of thise foles alle.’
Tr 1 911 “How often hastow maad thi nyce japes,
Tr 1 912 And seyd that Loves servantz everichone
Tr 1 913 Of nycete ben verray Goddes apes;
Tr 1 914 And some wolde mucche hire mete allone,
Tr 1 915 Liggyng abedde, and make hem for to grone;
Tr 1 916 And som, thow seydest, hadde a blaunche fevere,
Tr 1 917 And preydest God he sholde nevere kevere.
Tr 1 918 “And som of hem took on hym, for the cold,
Tr 1 919 More than ynough, so seydestow ful ofte.
Tr 1 920 And som han feyned ofte tyme, and told
Tr 1 921 How that they waken, whan thei slepen softe;
Tr 1 922 And thus they wolde han brought hemself alofte,
Tr 1 923 And natheles were under at the laste.
Tr 1 924 Thus seydestow, and japedest ful faste.
Tr 1 925 “Yet seydestow that for the moore part
Tr 1 926 Thise loveres wolden speke in general,
Tr 1 927 And thoughten that it was a siker art,
Tr 1 928 For faylyng, for t’ assaien overal.
Tr 1 929 Now may I jape of the, if that I shal;
Tr 1 930 But natheles, though that I sholde deye,
Tr 1 931 That thow art non of tho, I dorste saye.
Tr 1 932 “Now bet thi brest, and sey to God of Love,
Tr 1 933 ‘Thy grace, lord, for now I me repente,
Tr 1 934 If I mysspak, for now myself I love.’
Tr 1 935 Thus sey with al thyn herte in good entente.”
Tr 1 936 Quod Troilus, “A, lord! I me consente,
Tr 1 937 And preye to the my japes thow foryive,
Tr 1 938 And I shal nevere more whyle I live.”
Tr 1 939 “Thow seist wel,” quod Pandare, “and now I hope
Tr 1 940 That thow the goddes wrathe hast al apesed;
Tr 1 941 And sithen thow hast wopen many a drope,
Tr 1 942 And seyd swych thyng wherwith thi god is plesed,
Tr 1 943 Now wolde nevere god but thow were esed!
Tr 1 944 And thynk wel, she of whom rist al thi wo
Tr 1 945 Hereafter may thy comfort be also.
Tr 1 946 “For thilke grownd that bereth the wedes wikke
Tr 1 947 Bereth ek thise holsom herbes, as ful ofte
Tr 1 948 Next the foule netle, rough and thikke,
Tr 1 949 The rose waxeth swoote and smothe and softe;
Tr 1 950 And next the valeye is the hil o-lofte;
Tr 1 951 And next the derke nyght the glade morwe;
Tr 1 952 And also joie is next the fyn of sorwe.
Tr 1 953 “Now loke that atempre be thi bridel,
Tr 1 954 And for the beste ay suffre to the tyde,
Tr 1 955 Or elles al oure labour is on ydel:
Tr 1 956 He hasteth wel that wisely kan abyde.
Tr 1 957 Be diligent and trewe, and ay wel hide;
Tr 1 958 Be lusty, fre; persevere in thy servyse,
Tr 1 959 And al is wel, if thow werke in this wyse.
Tr 1 960 “But he that departed is in everi place
Tr 1 961 Is nowher hol, as writen clerkes wyse.
Tr 1 962 What wonder is, though swich oon have no grace?
Tr 1 963 Ek wostow how it fareth of som servise,
Tr 1 964 As plaunte a tree or herbe, in sondry wyse,
Tr 1 965 And on the morwe pulle it up as blyve!
Tr 1 966 No wonder is, though it may nevere thryve.
Tr 1 967 “And sith that God of Love hath the bistowed
Tr 1 968 In place digne unto thi worthinesse,
Tr 1 969 Stond faste, for to good port hastow rowed;
Tr 1 970 And of thiself, for any hevynesse,
Tr 1 971 Hope alwey wel; for, but if drerinesse
Tr 1 972 Or over-haste oure bothe labour shende,
Tr 1 973 I hope of this to maken a good ende.
Tr 1 974 “And wostow why I am the lasse afered
Tr 1 975 Of this matere with my nece trete?
Tr 1 976 For this have I herd seyd of wyse lered,
Tr 1 977 Was nevere man or womman yet bigete
Tr 1 978 That was unapt to suffren loves hete,
Tr 1 979 Celestial, or elles love of kynde;
Tr 1 980 Forthy som grace I hope in hire to fynde.
Tr 1 981 “And for to speke of hire in specyal,
Tr 1 982 Hire beaute to bithynken and hire youthe,
Tr 1 983 It sit hire naught to ben celestial
Tr 1 984 As yet, though that hire liste bothe and kowthe;
Tr 1 985 But trewely, it sate hire wel right nowthe
Tr 1 986 A worthi knyght to loven and cherice,
Tr 1 987 And but she do, I holde it for a vice.
Tr 1 988 “Wherfore I am, and wol ben, ay redy
Tr 1 989 To peyne me to do yow this servyse;
Tr 1 990 For bothe yow to plese thus hope I
Tr 1 991 Herafterward; for ye ben bothe wyse,
Tr 1 992 And konne it counseil kepe in swych a wyse
Tr 1 993 That no man shal the wiser of it be;
Tr 1 994 And so we may ben gladed alle thre.
Tr 1 995 “And, by my trouthe, I have right now of the
Tr 1 996 A good conceyte in my wit, as I gesse,
Tr 1 997 And what it is, I wol now that thow se.
Tr 1 998 I thenke, sith that Love, of his goodnesse,
Tr 1 999 Hath the converted out of wikkednesse,
Tr 1 1000 That thow shalt ben the beste post, I leve,
Tr 1 1001 Of al his lay, and moost his foos to greve.
Tr 1 1002 “Ensample why, se now thise wise clerkes,
Tr 1 1003 That erren aldermost ayeyn a lawe,
Tr 1 1004 And ben converted from hire wikked werkes
Tr 1 1005 Thorugh grace of God that list hem to hym drawe,
Tr 1 1006 Thanne arn thise folk that han moost God in awe,
Tr 1 1007 And strengest feythed ben, I undirstonde,
Tr 1 1008 And konne an errowr alderbest withstonde.”
Tr 1 1009 Whan Troilus hadde herd Pandare assented
Tr 1 1010 To ben his help in lovyng of Cryseyde,
Tr 1 1011 Weex of his wo, as who seith, untormented,
Tr 1 1012 But hotter weex his love, and thus he seyde,
Tr 1 1013 With sobre chere, although his herte pleyde:
Tr 1 1014 “Now blisful Venus helpe, er that I sterve,
Tr 1 1015 Of the, Pandare, I mowe som thank deserve.
Tr 1 1016 “But, deere frend, how shal my wo be lesse
Tr 1 1017 Til this be doon? And good, ek telle me this:
Tr 1 1018 How wiltow seyn of me and my destresse,
Tr 1 1019 Lest she be wroth — this drede I moost, ywys —
Tr 1 1020 Or nyl nat here or trowen how it is.
Tr 1 1021 Al this drede I, and ek for the manere
Tr 1 1022 Of the, hire em, she nyl no swich thyng here.”
Tr 1 1023 Quod Pandarus, “Thow hast a ful gret care
Tr 1 1024 Lest that the cherl may falle out of the moone!
Tr 1 1025 Whi, Lord! I hate of the thi nyce fare!
Tr 1 1026 Whi, entremete of that thow hast to doone!
Tr 1 1027 For Goddes love, I bidde the a boone:
Tr 1 1028 So lat m’ alone, and it shal be thi beste.”
Tr 1 1029 “Whi, frend,” quod he, “now do right as the leste.
Tr 1 1030 “But herke, Pandare, o word, for I nolde
Tr 1 1031 That thow in me wendest so gret folie,
Tr 1 1032 That to my lady I desiren sholde
Tr 1 1033 That toucheth harm or any vilenye;
Tr 1 1034 For dredeles me were levere dye
Tr 1 1035 Than she of me aught elles understode
Tr 1 1036 But that that myghte sownen into goode.”
Tr 1 1037 Tho lough this Pandare, and anon answerde,
Tr 1 1038 “And I thi borugh? Fy! No wight doth but so.
Tr 1 1039 I roughte naught though that she stood and herde
Tr 1 1040 How that thow seist! but farewel, I wol go.
Tr 1 1041 Adieu! Be glad! God spede us bothe two!
Tr 1 1042 Yef me this labour and this bisynesse,
Tr 1 1043 And of my spede be thyn al that swetnesse.”
Tr 1 1044 Tho Troilus gan doun on knees to falle,
Tr 1 1045 And Pandare in his armes hente faste,
Tr 1 1046 And seyde, “Now, fy on the Grekes alle!
Tr 1 1047 Yet, parde, God shal helpe us atte laste.
Tr 1 1048 And dredelees, if that my lyf may laste,
Tr 1 1049 And God toforn, lo, som of hem shal smerte;
Tr 1 1050 And yet m’ athenketh that this avant m’ asterte!
Tr 1 1051 “Now, Pandare, I kan na more seye,
Tr 1 1052 But, thow wis, thow woost, thow maist, thow art al!
Tr 1 1053 My lif, my deth, hol in thyn hond I leye.
Tr 1 1054 Help now!” Quod he, “Yis, by mi trowthe, I shal.”
Tr 1 1055 “God yelde the, frend, and this in special,”
Tr 1 1056 Quod Troilus, “that thow me recomande
Tr 1 1057 To hire that to the deth me may comande.”
Tr 1 1058 This Pandarus, tho desirous to serve
Tr 1 1059 His fulle frend, than seyde in this manere:
Tr 1 1060 “Farwell, and thenk I wol thi thank deserve!
Tr 1 1061 Have here my trowthe, and that thow shalt wel here.”
Tr 1 1062 And went his wey, thenkyng on this matere,
Tr 1 1063 And how he best myghte hire biseche of grace,
Tr 1 1064 And fynde a tyme therto, and a place.
Tr 1 1065 For everi wight that hath an hous to founde
Tr 1 1066 Ne renneth naught the werk for to bygynne
Tr 1 1067 With rakel hond, but he wol bide a stounde,
Tr 1 1068 And sende his hertes line out fro withinne
Tr 1 1069 Aldirfirst his purpos for to wynne.
Tr 1 1070 Al this Pandare in his herte thoughte,
Tr 1 1071 And caste his werk ful wisely or he wroughte.
Tr 1 1072 But Troilus lay tho no lenger down,
Tr 1 1073 But up anon upon his stede bay,
Tr 1 1074 And in the feld he pleyde tho leoun;
Tr 1 1075 Wo was that Grek that with hym mette a-day!
Tr 1 1076 And in the town his manere tho forth ay
Tr 1 1077 So goodly was, and gat hym so in grace,
Tr 1 1078 That ecch hym loved that loked on his face.
Tr 1 1079 For he bicom the frendlieste wight,
Tr 1 1080 The gentilest, and ek the mooste fre,
Tr 1 1081 The thriftiest, and oon the beste knyght
Tr 1 1082 That in his tyme was or myghte be;
Tr 1 1083 Dede were his japes and his cruelte,
Tr 1 1084 His heighe port and his manere estraunge,
Tr 1 1085 And ecch of tho gan for a vertu chaunge.
Tr 1 1086 Now lat us stynte of Troilus a stounde,
Tr 1 1087 That fareth lik a man that hurt is soore,
Tr 1 1088 And is somdeel of akyngge of his wownde
Tr 1 1089 Ylissed wel, but heeled no deel moore,
Tr 1 1090 And, as an esy pacyent, the loore
Tr 1 1091 Abit of hym that gooth aboute his cure;
Tr 1 1092 And thus he dryeth forth his aventure.